काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले विपक्षी दलले उठाएका विषयमा सरकार सकारात्मक नभए सडक आन्दोलन गर्ने चेतावनी दिएका छन् ।
शनिबार चितवनको भरतपुरमा संयुक्त एम्बुलेन्स चालक संघ नेपाल (ट्रेड युनियन संघ)को सातौँ वार्षिकोत्सवमा उनले विपक्षीहरू एकताबद्ध भएर राष्ट्र र जनताका पक्षमा आवाज उठाएको उल्लेख गरे । सरकारले आफ्ना कुरालाई गम्भीर रूपमा नलिए सडक आन्दोलन गर्ने उनले चेतावनी दिए ।
मुलुकको सुशासन, सामाजिक न्याय, आर्थिक अराजकताविरुद्ध आफू नेतृत्वको तत्कालीन सरकारले अभियान नै चलाएको उनले बताए । त्यसपछि सरकार छाड्नुपर्ने अवस्था पैदा भएको उनले जिकिर गरे ।
उनले देशको राजनीति सहज रूपमा अघि बढ्न नसकेका कारण धेरै समस्या सिर्जना भएको बताए । आफ्नै पहलका कारण शान्ति प्रक्रियालाई निष्कर्षमा पुर्याउने कार्य अन्तिम चरणमा पुगेको उनको भनाइ थियो ।
एम्बुलेन्सका क्षेत्रमा ‘सिन्डिकेट’ अन्त्य हुनुपर्नेसहितका संयुक्त एम्बुलेन्स चालक संघले राखेका १३ बुँदे मागप्रति आफू सकारात्मक रहेको भन्दै प्रचण्डले संसद् बैठकमा गम्भीर ढंगले यो विषय उठान गर्ने प्रतिबद्धता जनाए ।
