काठमाडौं । सहारा चितवन सहकारी ठगी प्रकरणमा पूर्वगृहमन्त्रीसमेत रहेका रास्वपा सभापति रवि लामिछानेको बयान सुरु भएको छ । मंगलबार मुद्दा दायर भएपछि बुधबार कार्यालय समयमै चितवन जिल्ला अदालतमा उपस्थित भएका लामिछानेको बयान न्यायाधीश दयाराम ढकालको इजलासमा भइरहेको सूचना अधिकारी अमृत विश्वकर्माले जानकरी दिए ।
विश्वकर्माका अनुसार करिब साढे १२ बजे देखि नै सुरु भएको बयान जारी छ । बयान सकिएपछि लामिछानेको थुनछेकको सुरुवाइ यही इजलासमा प्रारम्भ हुनेछ । सुरुवाइपछि अदालतले पुपक्षका लागि थुनामा पठाउने, धरौटीमा रिहा गर्ने वा साधारण तारिखमा छाड्ने आदेश गर्नेछ ।
गत असोजदेखि सहारा चितवन सहकारी ठगीमा १७ जनाविरुद्ध मुद्दा चलिरहेको छ । मंगलबार लामिछानेसहित थप १५ जना व्यक्ति र ६ वटा कम्पनीविरुद्ध ठगी तथा संगठित अपराध अभियोगमा पूरक मुद्दा दायर भएको थियो ।
