तिलोत्तमा । शंकरनगर वन विहार तथा अनुसन्धान केन्द्र (वनबाटिका) को चौथो अधिवेशन अन्तर्गत अध्यक्ष पदका उम्मेदवार खिमलाल पाण्डेले आफ्ना प्रतिवद्धता सार्वजनिक गरेका छन् । पाण्डे हालका उपाध्यक्ष हुन् । 
पाण्डेले बुधबार पत्रकार सम्मेलन गरी आफू निर्वाचित भएको खण्डमा गर्ने योजना सार्वजनिक गरेका हुन् । उनले वनवाटिकालाई राष्ट्रियस्तरकोे उद्यान बनाउने,नमूना चिडिया घर बनाउने, वहुउद्देश्यीय टावर सञ्चालनमा ल्याउने , बालमैत्री उद्यान बनाउने, सन्ध्याकालीन उद्यान बनाउने , जेष्ठ नागरिक मिलन केन्द्रको व्यवस्था,स्वीमिङ पूल निर्माण, पानी पोखरी बनाई बोटिङ सञ्चालन,संस्थापक अध्यक्ष बाबुराम अर्यालको उद्देश्य साकार पार्ने लगायत काम गर्ने घोषणा गरे । उनले आफू संस्था स्थापनादेखि १९ वर्षसम्म काम गरेकाले अहिले अध्यक्षमा उम्मेदवार बनेको बताए । 
यसअघि मंगलबार इन्जिनियर किरण खरेल नेतृत्वको प्यानलले पनि अधिकांश यिनै विषय सहित २४ बुंदे प्रतिवद्धता सार्वजनिक गरेका थिए । वनवाटिकाको चैत २२ गते हुने अधिवेशनमा किरण खरेल नेतृत्वमा संयुक्त प्यानल र राष्ट्रिय जनमुक्ति पार्टीको छुट्टै प्यानलले उम्मेदवारी दर्ता गरेको छ । खिमलाल पाण्डेले भने प्यानल विना एक्लै उम्मेदवारी दिएका हुन् । माओवादी केन्द्रबाट बेलप्रसाद शर्माले उम्मेदवारी दर्ता गरेका थिए तर पछि फिर्ता लिए । माओवादी केन्द्रका सौरभ भुसालले कोषाध्यक्षमा उम्मेदवारी दिएका छन् । सचिव पदमा एमाले–कांग्रेस गठबन्धनका किरण खरेल प्यानलबाट हरिकला अधिकारी (कमला)को उम्मेदवारी परेको छ भने  कांग्रेसकै विदुर केसीले स्वतन्त्र उम्मेदवारी दिएका छन् ।  
वार्षिक ३ करोड रुपैयांको कारोबार हुने वनवाटिकामा वार्षिक ५ लाख पर्यटक आउने गर्छन् । 
(((((