कपिलवस्तु । लुम्बिनी विकास कोषका उपाध्यक्ष डा.ल्हारक्याल लामा (खेन्पो छिमे छिरिङ) ले प्राचीन शाक्य राज्यको राजधानी तिलौराकोट (कपिलवस्तु) को गुरुयोजना बनाएर विकास गर्नु पर्ने बताएका छन् । तिलौराकोटमा आयोजित २५६९औँ बुद्ध जयन्ती तथा प्रसूति उत्सव कार्यक्रममा बोल्दै कपिलवस्तु, रामग्राम र देवदहको विकासका लागि गुरुयोजना बनाएर बौद्ध विहार र गुम्बाहरु निर्माण गर्नु पर्ने बताएका हुन् ।
“कम्तिमा पूजा गर्नका लागि गुम्बा चाहियो, आउने पर्टकहरुलाई बासको व्यवस्था गर्नु पर्यो ।”– उनले भने । तिलौराकोट विश्व सम्पदा सूचीमा सूचीकरण हुने अन्तिम चरणमा रहेको जानकारी दिँदै उपाध्यक्ष लामाले यस क्षेत्रको विकासका लागि संघ, प्रदेश र स्थानीय सरकारका जनप्रतिनिधिहरुले पहल गर्नुपर्ने बताए ।
२०४२ सालमा निर्माण गरिएको लुम्बिनी विकास ऐनले प्रदेश र स्थानीय सरकारले नचिन्ने भएका कारण ऐन संशोधन गर्नु पर्नेमा जोड दिए । ऐनमा जे सुकै उल्लेख भएको भए पनि प्राचिन सम्पदाहरुमा स्थानीयको पहिलो अधिकार हुने भएकाले तिलौराकोट क्षेत्रको विकासका लागि हातेमालो गर्न स्थानीय बासिन्दासँग उनले आग्रह गरे ।
ऐन संशोधनका लागि प्रधानमन्त्रीलाई आग्रह गरेको उल्लेख गर्दै उपाध्यक्ष लामाले ऐन खुकुलो हुने हो भने बौद्ध क्षेत्रको विकास गर्न सरकारको बजेट आवश्यक नपर्ने बताए । “संसारभर लाखौँको संख्यामा बौद्धमार्गीहरु छन्, बजेटको समस्या हुँदैन, पैसाको व्यवस्था हामी गर्छौँ, बरु सयन्त्र बनाएर सरकारले नै खर्च गरोस् ।” – उपाध्यक्ष लामाले भने । तिलौराकोटलगायतका बौद्ध क्षेत्रको विकासका लागि आफू प्रतिबद्ध रहेको बताउँदै उनले यसका लागि सबै क्षेत्रको साथ सहयोग आवश्यक पर्ने बताए ।
कार्यक्रमको अवसरमा मंगलबार बिहान शिशु बुद्धको प्रतिमालाई शोभायात्रासहित नगर परिक्रमा गराउँदै तिलौराकोट लगेर ‘प्रसूति उत्सव’ गरिएको थियो । शिशु बुद्धको प्रतिमा लिन कपिलवस्तुका प्रमुख जिल्ला अधिकारी दिलकुमार तामाङसहितको टोली बुद्ध जन्मस्थल लुम्बिनी आएको थियो ।
शिशु बुद्ध लिएर गएको प्रमुख जिल्ला अधिकारी तामाङसहितको टोलीलाई तिलौराकोटमा बाजागाजासहित भव्य स्वागत गरिएको थियो ।
