काठमाडौँ । चीनको केरुङमा व्यवसाय तथा रोजगारीमा गएर अलपत्र परेका नेपाली नागरिकलाई बुधवार नेपाल फर्काउने तयारी पूरा भएको छ ।
असार २४ मा रसुवाको गोसाईंकुण्ड गाउँपालिका वडा नम्बर–२ स्थित रसुवागढीमा आएको बाढीको कारण मितेरी पुल बगाएपछि चीनतर्फ गएका २०३ जना केरुङमा फसेका थिए ।
नेपाल–चीन सीमानाको लेन्दे खोला हुँदै भोटेकोशीमा आएको बाढीका कारण सड्क सम्पर्क अवरुद्ध भएपछि अलपत्र परेका २०३ जनालाई सिन्धुपाल्चोक स्थित तातोपानी नाकाबाट फर्काउने व्यवस्था गरिएको हो ।
गृह मन्त्रालय र परराष्ट्र मन्त्रालय मार्फत चीनसँगको समन्वयमा त्यहाँ अलपत्र नेपालीलाई बुधवार फर्काउन लागिएको रसुवाका डीएसपी हेम बहादुर शाहीले रातोपाटीलाई बताए । उनले भने, ‘हाम्रो र चीनतर्फका स्थानीय प्रशासनको निरन्तर समन्वयमा निःशुल्क रूपमा नेपाली नागरिकलाई नेपाल ल्याउने तयारी पुरा भएको छ ।’
तातोपानी नाकाबाट उनीहरूलाई काठमाडौँसम्म लैजाने व्यवस्था मिलाइएको डीएसपी शाहीले जानकारी दिए ।
