प्रकाश डोटेल
स्याङ्जा
स्याङ्जाको भीरकोट नगरपालिका–३ बानेथोक भञ्ज्याङ्की पूर्णकला एसके उमेरले ५५ पुगिन् । ५५ वर्षको उमेर कटाएकी एसकेलाई पानीको चिन्ताले कहिल्यै छाडेन । छोराछोरी हुर्केबढे, दुःख सुख कमाइ खाने भए पनि उनलाई पानीको पिरलो थियो नै । बिहान सबेरै पानी बोक्न खोल्साखोल्सी र कुवा खोज्दै हिंड्नुपर्ने बाध्यता पछिल्लो समय हटेर गएको उनले सुनाइन् ।

एसकेको त्यो चिन्ता र पिरलो सानो खोल्सा लिफ्टिङ् खानेपानी योजनाले अन्त्य गरिदिएको छ । अहिले घरघरमा मिटरसहित धारा जडान भएपछि उनी खुशी छिन् । स्थानीय ४७वर्षीय सीता दमै पानी बोक्ने दुःखका दिन सम्झदै भन्छिन्–‘पहिले अतिनै गाह्रो थियो, डोकोमा पानी बोकेर एक घण्टासम्म पैदल हिंड्नु पथ्र्यो अहिले त आँगनमै पानी थाप्न पाइएको छ ।’

योजनाबाट बानेथोक भञ्ज्याङ्का १ सय ५० घरपरिवारका झण्डै ५ सय सदस्यमा खुशी छाएको छ । गण्डकी प्रदेश सरकार, भीरकोट नगरपालिका र जनश्रमदानबाट सानो खोल्सा लिफ्टिङ् खानेपानी योजना सम्पन्न भएपछि गाउँका करिब १ सय ५० घरधुरीमा शुद्ध खानेपानीको सुविधा पुगेको छ । 

गाउँमा पानी वितरण गर्न ५ वटा टंकी निर्माण गरिएको छ । १५ हजारका ३ वटा, २५ हजार र अर्काे ३० हजार लिटर क्षमताका पानी टंकी निर्माण भएका छन् । भीरकोट नगरपालिकाका नगरप्रमुख गोविन्दकुमार कर्मार्चायले खानेपानी योजना सम्पन्न गर्न ७ वर्ष लागेको सुनाए । उनले भने– ‘भञ्जाङ्मा अधिकांश दलित र जातजातिको बाक्लो बस्ति छ, योजनाबाट उनीहरु नै लाभान्वित भएका छन् ।’

नगरप्रमुख कर्माचार्यले सानो खोल्सा लिफ्टिङ् आयोजना पालिकाको गौरवको आयोजना भएकाले प्राथमिकताका साथ बजेट विनियोजन गरेको बताए । आर्थिक र प्राविधिक कारणले ढिला भए पनि स्थानीयको खानेपानी समस्या समाधान गर्न आफूहरु सफल भएकामा कर्माचार्य पनि उत्तिकै खुशी छन् । २ सय मिटर भर्टीकल र ७ सय ५० मिटर होरिजेन्टल उचाइमा सानो खोल्सा मुहानबाट पानी लिफ्टिङ् गरेर गाउँमा वितरण गरिएको छ ।

भीरकोट नगरपालिकाले २०७५ सालमा सुरु गरेको योजनामा नगरपालिकाको करिब १ करोड लगानी भएको नगरपालिकाका योजना शाखा प्रमुख यामप्रसाद रेग्मीले बताए । गौरवको आयोजना भएकाले ७ वर्षसम्म निरन्तर बजेट विनियोजन गरेको योजनामा प्रदेश सरकार र स्थानीयको जनश्रमदान गरी झण्डै २ करोड लगानी भएको रेग्मीले जानकारी दिए । 

खानेपानी तथा सरसफाइ डिभिजन कार्यालयद्वारा ६ करोड ७० लाख बजेट लाग्ने अनुमान गरिएको योजना स्थानीय सरकारले करिब २ करोडमै सम्पन्न गरेको छ ।  निवर्तमान नगर प्रमुख छायाँराम खनालले बजेट लागतअनुमान धेरै भएपछि समयमा सम्पन्न नहुने ठानेर स्थानीय सरकारकै पहल र लगानीमा खानेपानी योजना सुरु गरेको सुनाए ।

खानेपानी कार्यालय र नगरपालिकाको पहलमा बानेथोककै सानीचौर दलित बस्तीका करिब ६० घरपरिवारमा खानेपानीको सुविधा पु¥याएको वडाध्यक्ष केशरबहादुर खड्काले बताए । 

एक आधारभूत विद्यालय र ६० घरपरिवार दलित बस्तीले भोग्दै आएको सास्तीलाई सानीचौर खानेपानी योजनाले अन्त्य गरेको खड्काले जानकारी दिए ।