बुटवल ।रुकुमपूर्वको सदरमुकाम तोक्ने विषयमा फेरि विवाद भएको छ। साउन ७ गते मन्त्रिपरिषद्ले सिस्ने गाउँपालिका–५ र ६ मा पर्ने रुकुमकोटलाई सदरमुकाम घोषणा गरेको निर्णयविरुद्ध सर्वोच्च अदालतमा पुनः रिट परेको हो।
प्रतिनिधिसभा सदस्य कुसुमदेवी थापा, लुम्बिनी प्रदेशसभा सदस्यहरू सुरुल पुनमगर, दिलकुमारी बुढामगर, सरिता पुनमगर, पुथा उत्तरगंगा गाउँपालिकाका अध्यक्ष पुनिराज घर्तीमगर र भूमे गाउँपालिकाका अध्यक्ष होमप्रकाश श्रेष्ठले संयुक्त रूपमा रिट दर्ता गराएका हुन्।
सरकारको निर्णयले यसअघि सर्वोच्च अदालतको परमादेशको अवज्ञा भएको दाबी गर्दै उनीहरूले जनभावनालाई बेवास्ता गरिएको रिटमा उल्लेख गरेका छन्।
सर्वोच्चले बिहीबार सरकारलाई रुकुमकोटलाई सदरमुकाम तोक्नुको कारण देखाउन माग गर्दै अन्तरिम आदेश जारी गरेको छ। सर्वोच्चले २०८० भदौ २७ मा दिएको परमादेशमा मापदण्डसहितको अध्ययनका आधारमा मात्र सदरमुकाम तोक्नुपर्ने स्पष्ट निर्देशन दिएको थियो।
कांग्रेस सभापति शरेबहादुर देउवा नेतृत्वको सरकारले २०७४ माघ ११ मा पुथा उत्तरगंगा–१२ गोल्खाडालाई सदरमुकाम बनाउने निर्णय गरेपछि त्यसको विरोधमा रुकुमकोट पक्षधरहरू सर्वोच्च पुगेका थिए।
दुई पक्षबीच विवाद हुँदा त्यतिबेला कर्फ्यु लगाउनुपर्ने स्थिति आएको थियो। सरकारको अघिल्लो निर्णय बदर गर्दै मापदण्ड बनाएर मात्रै सदरमुकाम तोक्न सर्वोच्चले आदेश दिएको थियो। तर अहिलेको निर्णयले फेरि विवाद दोहोरिएको छ।
