नवलपरासी । नवलपरासी पश्चिममा वार्षिक रुपमा ८ लाख ७५ हजार ६९ मेट्री टन खाद्यान उत्पादन हुने गरेको कृषि ज्ञानकेन्द्रले जनाएको छ ।
कुल खेती योग्य जमिन २७ हजार हेक्टरमा उक्त खाद्यान उत्पादन हुने कृषि ज्ञानकेन्द्रका प्रमुख डाक्टर रविन्द्र नाथ चौवेले बताए । उनले उक्त कुरा मंगलबार आयोजित ४५औँ विश्व खाद्य दिवस कार्यक्रममा बताएका हुन् । कृषि ज्ञानकेन्द्र पश्चिम नवलपरासीको आयोजनामा ४५औँ विश्व खाद्य दिवस मनाइएको छ ।
जिल्ला समन्वय समितिका प्रमुख भगवति यादवले उक्त अवसरमा कृषिको क्षेत्रमा तीनवटै सरकारको समन्वयमा किसानलाई मलखाद, बिउ बिजन र सिँचाइको प्रबन्ध गर्नुपर्ने बताए । किसानले उत्पादन गरेको वस्तुको बजारीकरण आवश्यक भएकोमा जोड दिँदै प्रमुख यादवले अहिलेको अवस्थामा स्वच्छ, पोषणयुक्त र सन्तुलित भोजन सबैलाई आवश्यता रहेको जनाए ।
स्वच्छ, पोषणयुक्त र सन्तुलित भोजनको महत्त्वबारे जनचेतना फैलाउने उद्देश्यसहित प्रत्येक वर्ष अक्टोबर १६ मा यो दिवस मनाउने गरिन्छ । यस वर्षको दिवसको नारा ‘स्वच्छ खाना र सुखद भविष्यका लागि हातेमालो’ भन्ने नाराका साथ मनाइएको छ । संयुक्त राष्ट्रसंघको २०औँ साधारणसभाले सन् १९७९ मा खाद्य तथा कृषि संगठन (एफएओ) को स्थापना दिवसका अवसरमा खाद्य दिवस मनाउने प्रस्ताव पारित गरेको थियो ।
त्यसयता सन् १९८१ देखि हरेक वर्ष विश्व खाद्य दिवस मनाइँदै आएको छ । दिवश अक्टोबर १६ मा मनाउने भएको भएता पनि नेपाल एक महिनासम्म मनाउने गरिएको छ ।
