स्याङ्जा । स्याङ्जाको अर्जुनचौपारी गाउँपालिकामा नेपालमै पहिलोपटक ध्वनि चिकित्सा पद्धती (माध्यम) बाट उपचार सेवा सुरु गरिएको छ । गाउँपालिकाले ‘साउण्ड हिलिङ सेन्टर’ स्थापना गरी ध्वनि चिकित्सा पद्धतीबाट उपचार सेवा सुरु गरेको हो ।
अर्जुनचौपारी गाउँपालिका–१ मा स्थापित नेपालकै पहिलो नवग्रह मन्दिर परिसरमा ध्वनि चिकित्सा पद्धती सञ्चालनमा आएको छ । मानिसमा कार्य ब्यस्तता बढेसँगै तनाव बढ्दै जाने र जसले शरीरका महत्वपूर्ण ऊर्जाहरु क्षीण भई रोगविरुद्ध लड्ने प्रतिरक्षा प्रणाली कमजोर बन्दै जाँदा ध्वनि चिकित्सा पद्धतीको उपचार बरदान सावित हुन अपेक्षा गरिएको छ ।
विभिन्न सप्त धातुहरुबाट निर्मित उपकरणको प्रयोगबाट मानिसको शरीर, मन र आत्मालाई ध्वनिको माध्यमबाट शुद्धगरी सप्त चक्रलाई क्रियाशिल गरिन्छ । ध्वनिबाट सकरात्मक सोंचको सृजना गराएर विकास गराउँदै उर्जा प्रदान गर्ने पद्धती नै ध्वनि चिकित्सा हो ।
गाउँपालिकाद्वारा सञ्चालित नवप्रवर्तनशिल कार्यमध्ये ध्वनि चिकित्सा पद्धतीले अर्जुनचौपारीलाई वेलनेश टुरिजमको गन्तव्य बनाएर विकासका गतिविधि सञ्चालन गर्ने गाउँपालिकाले योजना बनाएको छ । गाउँपालिकाकी उपाध्यक्ष सपना गुरुङले नेपालमै पहिलो पटक सुरु गरिएको ध्वनि चिकित्सा पद्धतीलाई आगामी दिनमा नवग्रह मन्दिरमा आउने भक्तजनलाई समेत सेवा उपलब्ध गराउने गरी योजना बनाएको बताइन् ।
ध्वनि उपचार पद्धति प्राचीन प्राकृतिक चिकित्सा पद्धति हो । ध्वनि उपचारले शरीरको ऊर्जा क्षेत्र र चक्रहरुसँग सीधा सरोकार राख्छ । जब ऊर्जा क्षेत्र र चक्र सन्तुलित हुन्छ मानव शरीर स्वस्थ बन्दै जान्छ भन्ने विश्वास गरिन्छ । उपचारपछि शरीरले स्वतः आफ्नो प्राकृतिक क्षमतामा क्रियाशिल बन्दैजाँदा मानिस स्वच्छ बन्दै जाने बताइन्छ ।
ध्वनि उपचारमा मस्तिष्क र स्नायु प्रणालीलाई प्रभाव पार्न विशेष तरङ्गको प्रयोग गर्छ । सोही तरङ्गको फ्रिक्वेन्सीले मस्तिष्क र स्नायु प्रणालीलाई सन्तुलनमा ल्याउने काम गर्छ भन्ने विश्वास छ । निष्कृय भएका शरीरका विभिन्न अंगमा ध्वनिले ऊर्जाशिल बनाउँदैै सन्तुलन पुनःस्थापित गराउन उपचार सहयोगी बन्ने गाउँपालिकाका प्रमुख प्रशासकीय अधिकृत युवराज अर्यालले बताए ।
शरीर र मनमा भएका अनेकौँ विकारजन्य वस्तुलाई ध्वनि उपचारबाट निराकरण गर्न सकिन्छ । जसमा चिकित्सकले एक वा सोभन्दा बढी कचौरा बजाएर ध्वनि उपचार गर्ने गर्दछन् । कचौरा, मन्दिरका घण्टीहरु र सोही प्रकृतिका वाद्ययन्त्रहरुको सहायताले ध्वनि उपचार गरिंदै आएको छ ।
ध्वनि स्नानले क्रोध, रिस, इष्र्याबाट छुटकारा पाइन्छ । ध्वनिले मन र शरीरलाई स्थिर र चङ्गा बनाउँछ । हरेक ध्वनिको लय र आवाजमा फरकपन भेटिने गरेको बताइन्छ । ध्वनि उपचार भनेको गुञ्जन हो । उपचारका लागि गाउँपालिकाले छुट्टै कक्ष, उपकरणसहित तालिम प्राप्त जनशक्तिको समेत व्यवस्थापन गरिसकेको गाउँपालिकाले जनाएको छ ।
