प्रकाश डोटेल
स्याङ्जा
स्याङ्जाको प्रमुख व्यापारिक केन्द्र वालिङमा प्रथम वालिङ सडक खाना महोत्सव सुरु भएको छ । वालिङ खेलमैदानदेखि सुर्कौँदी पुलसम्म १९ गतेसम्म सञ्चालन हुने तीन दिने प्रथम वालिङ सडक खाना महोत्सवको वालिङ नगरपालिकाले आयोजना गरेको हो । मौलिक खानालाई प्रवर्धन गर्दै बजारसम्म पु¥याउन आयोजना गरिएको सडक महोत्सवको ‘हाम्रो नगरमा हाम्रै खाना, स्थानीय वृद्धि हाम्रो चाहाना’ मुल नारा रहेको छ ।
सडक खाना महोत्सवले स्थानीय खानाको संरक्षण तथा दस्ताबेजीकरण, विभिन्न जातजातिको सांस्कृतिक विविधताको प्रचारप्रसार हुने अपेक्षा गरिएको छ ।
सडक खाना महोत्सव मार्फत पर्यटन नगरको ब्रान्डिङ, स्थानीय उत्पादनको बजार विस्तार, सामुदायिक एकता सद्भाव र पहिचान प्रवर्धन गर्ने उद्देश्यले आयोजना गरिएको महोत्सवमा २५ वटा स्टल रहेका छन् । महोत्सवमा गुरुङ, मगर, नेवार, बाहुन, क्षेत्रीलगायतका जातजातिहरुको मौलिक परिकारको प्रदर्शनी तथा बिक्री, जातीय तथा परम्परागत नृत्य, भेषभूषा, लोक संगीत, जातीय रितिरीवाज तथा जीवनशैली एकै थलोमा हेर्न सकिनेछ । आँधीखोले सभ्यता, स्थानीय इतिहास र समग्र नगरको सांस्कृतिक पहिचानलाई समेटेर आयोजना गरिएको महोत्सवमा स्थानीय चुलोचौकाको स्वाद, पुख्र्यौली परिकारदेखि आधुनिक परिकारसम्मको स्वाद लिन पाइनेछ आयोजकले जनाएको छ । महोत्सव सम्पन्न गर्न नगरपालिकाले ६ लाख रकम विनियोजन गरिएको वालिङ नगरपालिकाका प्रमुख कृष्ण खाँणले जानकारी दिए ।
महोत्सवमा स्थानीय कृषिलाई निःशुल्क स्टलको व्यवस्था गरिएको छ । स्थानीय किसानहरुले उत्पादन गरेका फलफूल, तरकारी, बिउबिजन तथा कृषि प्रविधि एवं नवीन उद्यमहरुको प्रर्दशनी र प्रवर्र्धन गरिनेछ । राष्ट्रिय ख्यातीप्राप्त कलाकारहरुको प्रस्तुतिदेखि नगरभित्रका प्रतिभा प्रस्फुटन समेत गरिने व्यवस्था मिलाइएको छ ।
प्रथम सडक खाना महोत्सवले स्थानीय तथा मौलिक खानाको प्रवर्धन गर्दै पर्यटन आवागमनको विकासका लागि टेवा पु¥याउने महोत्सवको उद्घाटन गर्दै जिल्ला समन्वय समिति स्याङ्जाका प्रमुख श्रीप्रसाद जिटीले बताए ।
महोत्सवले स्थानीय होटलहरुको प्रवर्धन गर्दै मौलिक खानालाई बजारसम्म ल्याउन सहयोगी बन्नेमा विश्वास गरेको बताउँदै प्रमुख जिटीले स्थानीय कलाकार र परिकार तथा उत्पादनलाई महोत्सवमा विषेश प्राथमिकता दिएकोमा खुसी व्यक्त गरे ।
