बुटवल । बुटवलमा फोहोरको वैज्ञानिक व्यववस्थापन जरुरी रहेको विज्ञ र सरोेकारवालाले जोड दिएका छन् । फोहोरको उचित व्यवस्थापन हुन नसक्दा यसले मानव स्वास्थ्य र वातावरणमा देखिने र नदेखिने गरी गम्भीर नकारात्मक असर पारिरहेको भन्दै उनीहरुले स्थानीय सरकारले आधुनिक प्रशोधन केन्द्र छिटो निर्माण गर्नुपर्ने सुझाव समेत दिएका छन् ।
पर्यावरण संरक्षण समाज नेपालको आयोजना र बुटवल उप–महानगरपालिकाको सहकार्यमा भएको अन्तरक्रिया तथा क्षमता अभिवृद्धि कार्यक्रममा फोहोरको दीगो व्यवस्थापनका लागि आधुनिक प्रशोधन केन्द्र अपरिहार्य रहेको भन्दै नगरवासीले पनि प्रशोधन केन्द्रका लागि जग्गा व्यवस्थापनमा साथ दिनुपर्ने आग्रह गरे ।
फोहोर व्यवस्थापनमा व्यक्तिको व्यवहार परिवर्तन र जनचेतना अभिवृद्धि पनि उत्तिकै महत्वपूर्ण रहेको विज्ञ विजय हितानले बताए ।
शहरी क्षेत्रमा तरल फोहोरले वातावरण र जनस्वास्थ्यमा गम्भीर नकारात्मक असर गरे पनि त्यसलाई स्थानीय सरकार र नगरवासीले बेवास्ता गरिरहेको उनले औंल्याए । हितानले बुटवल उप–महानगरपालिकामा धुवाँ, धुलो र वायु प्रदूषण मापन केन्द्र नहुनु विडम्बना भएको भन्दै बुटवलमा धुलो, धुवाँ र तिनाउको पानी सबै प्रदूषित रहेकाले विदेशी पर्यटकका लागि बस्नयोग्य शहर नरहेको भन्दै यसमा तत्काल सुधा गर्न सुझाव दिए ।
वातावरण संरक्षण र सरसफाइका लागि पर्याप्त बजेट विनियोजन गर्न जरुरी रहेकोमा उनले जोड दिए ।
कार्यक्रममा बोल्दै बुटवल उप–महानगरपालिकाका प्रमुख खेलराज पाण्डेले सरसफाइकर्मी नगरका प्रमुख पात्र भएको बताउँदै नगर सधैँ उनीहरुको सम्मानमा रहेको बताए । उप–प्रमुख सावित्रादेवी अर्यालले पहिलेको तुलनामा नगर केही हदसम्म सफा भएको दाबी गरिन् ।
बुटवल उप–महानगरपालिकाका सरसफाइकर्मीहरुको विशेष उपस्थितिमा गरिएको कार्यक्रममा सफाइकर्मीहरुले सरसफाइका क्रममा थुप्रै समस्याहरु आउने गरेको गुनासो गरेका छन् । साथै सरसफाइकर्मीका लागि आवश्यक सुरक्षा सामग्रीहरु पर्याप्त नभएको गुनासो गरेका हुन् । कार्यक्रममा स्वास्थ्य शाखा प्रमुख युवराज पाण्डे, सरसफाइ शाखा प्रमुख लक्ष्मी अर्याल, योजना शाखा प्रमुख ठगिश्वर पोखरेल, वातावरण संरक्षण समाज नेपालका गणेश घिमिरे, अर्जुन ज्ञवालीले आफ्ना धारणा राखेका थिए ।
वातावरण संरक्षण समाज नेपालका अध्यक्ष गंगा पोखरेलले प्लास्टिक फोहोरले वातावरण र खेतीयोग्य जग्गामा समेत नकारत्मक असर गरिरहेकाले यसको प्रयोग घटाउनुपर्ने बताइन् ।
बुटवलमा दैनिक ७५ टन फाहोर उत्पादन हुने गरेको छ । ल्याण्डफिल साइट नहुँदा अहिले उक्त फोहोर तिनाउ नदी किनारमा डम्पिङ गर्ने गरिएको छ । उपमहानगरले आधुनिक फोहोर प्रशोधन केन्द्र बनाउन जग्गाको खोजी कार्य भैरहेको जनाएको छ । यसअघि एशियाली विकास बैंकको ऋण सहयोगमा बनाउन खोजिएको प्रशोधन केन्द्र जग्गा विवादका कारण सफल हुन नसकेपछि एडीबीले हात झिकेको थियो ।
