बुटवल । बुटवल सुनचाँदी व्यवसायी संघ रूपन्देहीको सोमबार बुटवलमा सम्पन्न छैठौ वार्षिक साधारणसभा सम्पन्न भएको छ । सभामा बोल्ने वक्ताहरुले देशको जटिल राजनीति अवस्था, विश्वबजारमा सुनको मूल्यवृद्धि भ्याट र २ प्रतिशत बिलासिता कर जस्ता विषयको कारण व्यवसायीहरु पलायनको अवस्थामा पुगेको बताएका हुन् ।
कार्यक्रमको उद्घाटन गर्दै नेपाल सुनचाँदी व्यवसायी महासंघ लुम्बिनी प्रदेशका अध्यक्ष धु्रवकुमार गहतराजले राज्यबाट फरक ढंगबाट अनुगमन गरिरहेको बताउँदै यसकै आधारमा कर तोक्ने जस्ता काम भएको बताए । स्थापनाकाल देखिबाट नै भएको कारोबारलाई जोड्दै सञ्चालक र परिवारको समेत खाता हेर्ने जस्ता काम भैरहेको उनले बताए । माघ १ गतेबाट ५ लाखभन्दा बढीको बिल नहुने जस्ता सरकारबाट लगाइएको बन्देजका कारण व्यवसाय गर्न नसकिने अवस्था सृजना भएको उनले बताए ।
कार्यक्रममा संस्थाको प्रगति विवरण पेश गर्दै अध्यक्ष गोकुल विश्वकर्माले व्यवसायीहरुको हकहित र क्षमता अभिवृद्धिमा भएका गतिविधिबारे प्रकाश पारे । समस्यामा परेका व्यवसायीलाई सहयोग, सामाजिक उत्तरदायित्वअन्तर्गत खेल गतिविधि, राहतकोष स्थापना गरी सहयोग हस्तान्तरण गर्दै आएको उनले बताए । कार्यक्रममा महासंघका केन्द्रीय सदस्य तथा संघका निवर्तमान अध्यक्ष दिपककुमार विश्वकर्माले सुन व्यवसायमा देखिएको समस्या उठान गर्दै समाधानका पाटाहरुबारे प्रकाश पारे ।
कार्यक्रममा महासंघका केन्द्रीय सदस्य चेतनारायण विश्वकर्मा, पूर्व केन्द्रीय उपाध्यक्ष जोगलाल बिक, उपाध्यक्ष कृष्णबहादुर सुनार, कोषाध्यक्ष दलबहादुर रिसाल, सचिव चुरामणी विकले सुनचाँदी व्यवसायीहरुप्रति राज्यको दृष्टिकोण गलत रहेको भन्दै सच्याउनुपर्ने बताए ।
