तिलोत्तमा । रुपन्देहीको तिलोत्तमा–६ मा सञ्चालित रामचन्द्र–मैनादेवी अनाथ आश्रमको २९ औं वार्षिक साधारणसभा सम्पन्न भएको छ ।
साधारणसभामा बोल्दै तिलोत्तमा–६ का वडाध्यक्ष गणेश पाठकले राज्यले गर्नुपर्ने काम रामचन्द्र–मैनादेबी अनाथ आश्रमले गरेको भन्दै आश्रमलाई तिलोत्तमा नगरपालिका र आफ्नो वडाले सक्दो वजेट दिंदै आएको बताए । आश्रमबाट अनाथ असहाय बालबालिकाले शिक्षा–दिक्षासंगै असल संस्कार, नैतिकता सिकेको भन्दै अध्यक्ष पाठकले मैनादेवीको योगदानलाई वडा र नगरपालिकाले पनि उच्च सम्मान गरेको बताए । उनले पछिल्लो समय सामाजिक सञ्जालले समाजलाई गलत दिशामा लगेको भन्दै सबै नागरिक सचेत हुन आग्रह गरे । 
कार्यक्रममा संस्थाकी अध्यक्ष मैनादेवी भण्डारीले वार्षिक प्रतिवेदन प्रस्तुत गर्दै  आश्रममा अझै केही भौतिक पुर्वाधार बनाउन बांकी रहेको बताइन् । आश्रममा कर्मचारी राखेर व्यवस्थित ढंगले चलाउन अक्षयकोषलाई कम्तिमा एक करोड पु¥याउनुपर्ने खाँचो रहेको बताइन् । अहिले अक्षय कोषमा ७५ लाख रुपैयां रहेको उनले बताइन् । आश्रम स्थापनाको शुरुका डेढ दशक गाउँ–गाउँ डुलेर मुठीदान संकलनबाट आर्थिक स्रोतको जोहो गरेर आश्रमलाई यहाँसम्म ल्याएको भन्दै अहिले उमेर ढल्किंदै गएको र स्वास्थ्यले समेत साथ दिन छाडेकाले कर्मचारीलाई अक्षयकोषको ब्याजबाट तलब दिन सक्ने स्थिति बनाउन अक्षयकोषलाई एक करोड पु¥याउन सबैको साथ चाहिएको बताइन् । ३४ वर्षको उमेर देखि आश्रममा लागेको भन्दै उनले अहिले २९ वर्ष पुगेको बताइन् । कर्मचारी राख्न नसकेर आफै , श्रीमान् र छोराले आश्रमको काम गर्नुपरेको अध्यक्ष भण्डारीले गुनासो गरिन् । तीनजना अनाथबाट शुरु भएको आश्रमको आफ्नै भवन बनेपछि २५ जनासम्म राख्न मिल्ने क्षमताको भएको छ । अहिले आश्रममा १२ जना बालक छन् । उनीहरुले तिलोत्तमाकै शान्ति नमूना माविमा पढिरहेका छन् । ५ वर्ष पछि आश्रममा जेष्ठ नागरिकलाई पनि दिउसोमा राख्ने व्यवस्था गर्ने सोंच बनाएको उनले बताइन् । साधारणसभामा घनश्याम ज्ञवाली,इश्वरीप्रसाद बस्याल, सीता वस्ताकोटी, कमला पोखरेल लगायतले बोल्दै आश्रमलाई सहयोग गर्नु सबैको दायित्व भएको बताएका थिए ।