बुटवल । आगामी फागुन २१ गते हुने प्रतिनिधिसभा निर्वाचन नजिकिँदै जाँदा देशभर चुनावी सरगर्मी बढेको छ । यही क्रममा नेकपा एमालेका उम्मेदवार तथा गुल्मी क्षेत्र नम्बर २ का उम्मेदवार गोकर्ण विष्टले बुटवलमा रहेका गुल्मेली मतदातासँग खुला संवाद गर्दै ‘सुन्दै–सुनाउँदै’ अभियानमार्फत् सहरका युवा तथा आम मतदातासँग भेटघाट गरिरहेका छन् ।
गाउँकै मतदाता भए पनि अध्ययन, रोजगारी र व्यापारका लागि रुपन्देहीको बुटवलमा बस्ने गुल्मेली ठूलो संख्यामा छन् । मनोनयनपछि आफ्नो निर्वाचन क्षेत्रका गाउँ–गाउँमा पहिलो चरणको भेटघाट सकेर विष्ट विभिन्न सम्पर्क मञ्चमार्फत् बुटवलका मतदातासँग छलफल गरिरहेका छन् । शहरमा बसे पनि मतदाताले गाउँका समस्या खुलेर राखेका छन् ।
विष्टले बुटवलमा गुल्मी इस्मा–रुपन्देही, धुर्कोट–रुपन्देही, मदाने–रुपन्देही, मालिका–रुपन्देही, मुसिकोट–रुपन्देही र रेसुंगा–रुपन्देही सम्पर्क समाजमार्फत् मतदातासँग भेटघाट तथा छलफल गरेका छन् ।
भेटघाटका क्रममा मतदाताले गाउँमा जंगली जनावरको आतंक, पर्याप्त अस्पतालको अभाव, गुणस्तरीय शिक्षाको कमी र यसैकारण बढ्दो बसाइँसराइको समस्याबारे ध्यानाकर्षण गराएका थिए । बुटवलमा बस्दै आएका मदाने गाउँपालिका–२ बाझकटेरीका मदन भुसालले सिङ्गो पालिकाका मतदाताले उम्मेदवारसँग खुलेर समस्या राख्न पाएको अवसर उपयोगी भएको बताए ।
मतदातामाझ विष्टले विगतमा आफूले गरेका कामको फेहरिस्त प्रस्तुत गर्दै आफ्नो क्षेत्रमा बाँकी रहेका अधुरा काम पूरा गर्न पुनः उम्मेदवार बनेको बताए । उनले गुल्मीमा भौतिक पूर्वाधार क्षेत्रमा उल्लेखनीय प्रगति भएको भन्दै अबको प्राथमिकता मानवीय विकास, नीतिगत सुधार, आयआर्जन र रोजगारी सिर्जनामा केन्द्रित हुने जनाए ।
उनका अनुसार मदन भण्डारी राजमार्ग, दर्जनौँ पुल, गाउँ–गाउँमा कालोपत्रे, लिफ्ट खानेपानी, खरका छाना विस्थापन, विद्यालय–अस्पताल सुधार, स्वास्थ्यचौकी विस्तार, विद्युतिकरण र राष्ट्रिय प्रसारण लाइन विस्तारजस्ता काम भएका छन् । अब आर्थिक–सामाजिक सूचक सुधारमा जोड दिने उनले प्रतिबद्धता जनाए ।
विष्ट पाँचौँ पटक चुनावी प्रतिस्पर्धामा छन् । उनी २०५६ यताका अधिकांश निर्वाचनमा विजयी भएका नेता हुन् । २०६४ को संविधानसभा निर्वाचनबाहेक २०५६, २०७०, २०७४ र २०७९ मा उनी निर्वाचित भएका थिए । उनको निर्वाचन क्षेत्रमा कुल १,०७,३६३ मतदाता, ६२ मतदानस्थल र १२९ मतदान केन्द्र रहेका छन् ।
