कृष्ण पोखरेल
पाल्पा
अहिले देशभरी आगामी फागुन २१ गते हुने प्रतिनिधिसभा निर्वाचनको सरगर्मी बढिरहेको छ । निर्वाचनलाई भयरहित, निष्पक्ष र शान्तिपूर्ण बनाउन विभिन्न सुरक्षा निकाय दिनरात खटिरहेका छन्, तर, पाल्पामा खटिएका निर्वाचन प्रहरीले आफ्नो व्यावसायिक जिम्मेवारीसंगै मानवीय सेवामा खटिएका छन् । निर्वाचनको सुरक्षाको जिम्मेवारीसंगै रक्तदानमार्फत् बिरामीको ज्यान बचाउने पवित्र कार्यमा पाल्पाका निर्वाचन प्रहरीले हात बढाएका हुन् ।
एक महिने जागिरमा भर्ना भएका पाल्पाका निर्वाचन प्रहरीले देखाएको मानवसेवा कार्य देशमै नमूना बनेको छ । बिहानदेखि साँझसम्म निर्वाचन सुरक्षाको बारेमा तालिम तथा प्रशिक्षणमा खटिएका निर्वाचन प्रहरीले शनिबार समय मिलाएर रक्तदान कार्यक्रममा सहभागी भएका हुन् । जिल्ला प्रहरी कार्यालय पाल्पाको समन्वयमा र नेपाल रेडक्रस सोसाइटी पाल्पाको प्राविधिक सहयोगमा प्रहरी कार्यालय परिसरमै रक्तदान कार्यक्रम आयोजना गरियो । निर्वाचनको सुरक्षाको तालिममा सहभागी २५ जना निर्वाचन प्रहरीले स्वेच्छिक रक्तदान गरी सामाजिक सेवामा नमूना काम गरेका छन् । निर्वाचन सुरक्षामा खटिन पाउँदा गौरव लागेको थियो, त्यसमाथि रक्तदान गरेर कसैको ज्यान बचाउन पाउँदा झनै खुसी लागेको रक्तदानमा सहभागी निर्वाचन प्रहरी कमल भट्टराई बताए ।
प्रहरीको मुख्य उद्देश्य निर्वाचनलाई शान्तिपूर्ण बनाउनु हो, नागरिकको सुरक्षासँगै नागरिकको जीवन बचाउनु प्रहरीको अर्काे धर्म हो । निर्वाचन प्रहरीले देखाएको यो मानवीय भावनाले प्रहरी र नागरिकबिचको सम्बन्धलाई अझ प्रगाढ बनाएको छ । निर्वाचन प्रहरीले रक्तदानमा देखाएको सक्रियता समुदाय प्रहरीको आपसी सहकार्यबाटै शान्तिपूर्ण समाजको निर्माणको बाटो देखाएको जिल्ला प्रहरी कार्यालयका प्रमुख प्रहरी उपरीक्षक दिपेन्द्र पञ्जियार थारुले बताए ।
पाल्पामा लुम्बिनी मेडिकल कलेज, मिसन अस्पताल र पाल्पा अस्पताल गरी तीनवटा ठूला अस्पतालहरू सञ्चालनमा छन् । यी अस्पतालहरूमा दैनिक हुने जटिल शल्यक्रिया, सुत्केरी व्यथा र विभिन्न सडक दुर्घटनाका घाइतेहरूको उपचारका लागि रगतको माग उच्च रहने गरेको छ । जिल्लामै रगत व्यवस्थापनको लागि रेडक्रस पाल्पाले गएको भदौ महिनादेखि तानसेनमा रक्त सञ्चार केन्द्र सञ्चालन गरेको छ । तथ्याङ्कअनुसार पाल्पामा दैनिक १० युनिट, मासिक ३ सय युनिट र वार्षिक रूपमा करिब ३ हजार ६ सय युनिट रगतको आवश्यकता पर्दछ, यस्तो अवस्थामा सुरक्षाकर्मीले गरेको यो योगदानले रगतको अभाव टार्न ठूलो सहयोग पु¥याएको जिल्ला रेडक्रस पाल्पाका कार्यालय प्रमुख विनोद भारतीले बताए ।
पाल्पाका निर्वाचन प्रहरीले रगतको अभावमा छटपटाइरहेका बिरामीहरूका लागि ‘जीवनदाता’ बनेर नयाँ पहिचान बनाएका छन् । पाल्पाका २५ जना निर्वाचन प्रहरीले गरेको रगतको दान मात्र होइन, यो मानवसेवाको नमूना कार्य हो । निर्वाचनको सुरक्षा चुनौतीका बिच समय निकालेर समाजका लागि केही गरौं भन्ने भावना आफैंमा प्रशंसनीय रहेको छ । आगामी फागुन २१ गते हुने निर्वाचनमा निर्वाचन प्रहरीले शान्ति सुरक्षा प्रदान त गर्ने नै छन्, त्यसैगरी उनीहरूले गरेको रगत दानले धेरैको जीवनलाई सुनिश्चित बनाएको छ ।
