नवीन लोचनमगर
रोल्पा
रोल्पाबाट प्रतिनिधिसभा सदस्यका उम्मेदवार तथा पूर्वअर्थमन्त्री वर्षमान पुन ‘अनन्त’ले आगामी फागुन २१ गते हुने निर्वाचन दक्षिणपन्थी र अग्रगामीबिचको प्रतिस्पर्धा भएको बताएका छन् । बिहीबार रोल्पाको लिबाङमा आयोजित पत्रकार भेटघाटमा बोल्दै पुनले एकथान सांसद र सरकार बनाउने मात्रभन्दा पनि ठुलो वैचारिक दिशा दिनसक्ने सामथ्र्यसहित अहिलेको निर्वाचन भइरहेको बताए ।
‘अहिलेको निर्वाचन सामान्य निर्वाचन होइन । एकथान सांसद र एकथान सरकार बनाउने निर्वाचन मात्र होइन । वैचारिक रुपले पनि ठुलो डिपार्चर हुने देखिन्छ,’ पुनले भने–‘दक्षिणपन्थीले जित्यो भने अहिलेसम्म प्राप्त उपलब्धि, जनताका अधिकारहरु खोसिने खालको सम्भावना पनि छ । तर जनपक्षीय नेतृत्वले जित्यो भने अझ अगाडि जाने, सुशासन, समृद्धि, राष्ट्रिय स्वाधिनता, सामाजिक न्याय कायम गर्दै समाजवादतिर जाने सम्भावना पनि छ ।’
नेपाली कम्युनिष्ट पार्टीका प्रभावशाली नेताका रुपमा समेत चिनिने वर्षमा पुनले कांग्रेस–एमाले जस्तो पुरानो अतिवादी पार्टीहरु अब स्वीकार्य नभएको बताएका छन् ।
‘कांग्रेस एमाले जस्तो पुरानो अतिवादी पार्टीहरु छन्, जसले अहिलेकै पर्याप्त छ, अहिलेकै राज्य दोहन, भ्रष्टाचार, विचौलिया, दलाल अर्थतन्त्रलाई ठीकै मान्ने, थोरै मान्छेले मजाले लुट्ने र ठुलो संख्याले हेरेर बस्ने यस्तो प्रवृत्तिको हामी विरोधी हौं । त्यसअर्थमा यथास्थितिवादको हामी विरोधी हौं ।’– पुनले भने । दक्षिणपन्थी, यथास्थितिवादी र अग्रगामी शक्तिबिचको परीक्षण गर्ने पनि अहिलेको निर्वाचन भएको उनको भनाइ छ ।
