बुटवल । रुपन्देही क्षेत्र नम्बर २ का प्रतिनिधिसभा सदस्य पदका उम्मेदवारहरूले बुटवलस्थित ऐतिहासिक जितगढी किल्लाको माटोको टिका लगाउँदै राष्ट्रिय स्वाधीनताको पक्षमा दृढतापूर्वक उभिने सामूहिक प्रण गरेका छन् ।
नागरिक मञ्च अभियान नेपालले आयोजना गरेको ‘आसन्न निर्वाचन र राष्ट्रिय स्वाधीनताको प्रश्न’ विषयकजितगढीमा रूपन्देही–२ का उम्मेदवारसँग नागरिक अन्तरक्रिया कार्यक्रममा सहभागी उम्मेदवारहरूले जितगढीको माटो मुठ्ठीमा लिएर राष्ट्रहित, राष्ट्रियता र स्वाधीनताको रक्षा गर्ने प्रतिबद्धता व्यक्त गरेका हुन् ।
कार्यक्रममा अभियानका अध्यक्ष पदम कार्कीले आसन्न निर्वाचनको सन्दर्भ र राष्ट्रिय स्वाधीनताको सवालबारे आफ्नो अवधारणा प्रस्तुत गरेका थिए । प्रस्तुत अवधारणामाथि सहभागी उम्मेदवार तथा अतिथिहरूले ऐक्यबद्धता जनाउँदै राष्ट्रियता कमजोर हुने कुनै पनि गतिविधिको प्रतिवाद गर्ने धारणा राखेका थिए ।
अन्तत्र्रिmयामा नेकपाका उम्मेदवार सुवास पाण्डे (विश्वदिप) ले देशमा भएका परिवर्तनलाई संस्थागत गर्दै राष्ट्रियता अप्ठ्यारोमा परेको बेला सबै देशभक्त शक्ति एकजुट हुनुपर्ने बताए । प्रगतिशील लोकतान्त्रिक पार्टीका नारायण नागिला ले अवधारणापत्रप्रति समर्थन जनाउँदै चुनाव जिते वा हारे पनि राष्ट्रियता र स्वाधीनताको लडाइँमा अग्रपंक्तिमा रहने प्रतिबद्धता व्यक्त गरे ।
उज्यालो नेपाल पार्टीका ई. सुरज पाण्डे ले आफूहरू बोल्नभन्दा काम गर्न आएको उल्लेख गर्दै स्वाधीनतालाई खतरामा पार्ने कुनै कार्य नगर्ने स्पष्ट पारे । नेकपा (माओवादी)का वीरेन्द्र विक ले प्रतिबन्धको समयदेखि नै पार्टीले राष्ट्रियता र स्वाधीनताको पक्षमा संघर्ष गर्दै जेल–नेल व्यहोरेको स्मरण गराउँदै चुनावमा देशभक्ति र स्वाधीनताको पक्षमा बोल्ने उम्मेदवारलाई मत दिन आग्रह गरे ।
स्वतन्त्र उम्मेदवार एवम् अभियन्ता निकोलस भुषालले नेपाल स्वर्गको टुक्राजस्तो सुन्दर देश भएको उल्लेख गर्दै देश निर्माणका लागि सबै नागरिक एकजुट हुनुपर्ने बताए ।
राष्ट्रिय जनमोर्चाका लिलाबहादुर केसीले देशलाई संघीयतामा लैजाँदा स्वाधीनता कमजोर बनाउने प्रयास भइरहेको आरोप लगाउँदै देश बचाउने कि सक्काउने भन्ने निर्णायक घडी आएको बताए ।
कार्यक्रममा खबर गरिए पनि नेकपा एमालेका विष्णु पौडेल, नेपाली कांग्रेसका चुन्नु पौडेल र रास्वपाका सुलभ खरेल उपस्थित नभएको आयोजकले जनाएको छ । कार्यक्रमको सञ्चालन शिव डुम्रेले गरेका थिए भने स्वागत मन्तव्य ज्ञानु केसीले राखेकी थिइन् ।
