सनिउल्ला धोबी/ कपिलवस्तु । कपिलवस्तुका तीनवटै प्रतिनिधिसभा सदस्य निर्वाचन क्षेत्रमा नेपाली कांग्रेसका उम्मेदवारहरू चुनावी मैदानमा होमिएका बेला उनीहरूका श्रीमतीहरू पनि सक्रिय रूपमा घरदैलो अभियानमा खटिएका छन् ।
कपिलवस्तु क्षेत्र नं. १ बाट नेपाली कांग्रेसका उम्मेदवार अतहर कमाल मुसलमानको श्रीमती देवकला सुवेदी (डिना), क्षेत्र नं. २ का उम्मेदवार सुरेन्द्रराज आचार्यको श्रीमती जीवन आचार्य र क्षेत्र नं. ३ का उम्मेदवार अभिषेक प्रताप शाहको श्रीमती हिमानी मिनाक्षी शाह आफ्ना पतिलाई मत माग्न दिनहुुँ मतदाताको घरदैलोमा धाइरहेका छन् ।
मुसलमान, आचार्य र शाह पूर्व सांसद हुन् । कपिलवस्तुको तत्कालीन क्षेत्र नं. २ बाट दोस्रो संविधानसभाको निर्वाचनमा नेपाली कांग्रेसले टिकट नदिएपछि स्वतन्त्र भई मुसलमानले चुनाव जितेका थिए ।
सुरेन्द्रराज आचार्य संविधानसभाको एकपटक र संघीय सांसद भई एकपटक राज्यमन्त्री र एकपटक संघीय मन्त्री भएका हुन् ।
त्यसैगरी कपिलवस्तु क्षेत्र नं. ३ बाट लगातार तीन पटक सांसद भएका अभिषेक प्रताप शाह अहिले पनि कांग्रेसबाटै उम्मेदवार छन् । तीनैजनाका श्रीमतीहरू अहिले आफ्ना श्रीमानलाई जिताउन चुनावी दौडधुपमा छन् ।
उम्मेदवारको पक्षमा माहोल बनाउन, महिला मतदातासँग प्रत्यक्ष संवाद गर्न र विकासका एजेण्डा घर–घर पु¥याउन श्रीमतीहरू नै अग्रपंक्तिमा उत्रिएका छन् । पूर्व शिक्षिका रहेकी सुवेदी बिहानै महिला कार्यकर्ताको समूहसहित गाउँ–टोलमा पुग्छिन् र बेलुका अबेर मात्र घर फर्किन्छिन् ।
घरदैलोका क्रममा उनले मतदातालाई कांग्रेसका एजेन्डा, आफ्ना पतिले अघि सारेका विकास योजना तथा विगतमा गरेका कामबारे जानकारी गराउँछिन् । ‘श्रीमानलाई जिताउन पर्छ भनेर त्यसैअनुसार दिनरात खटिएकी छु ।’–सुवेदीले भनिन् ।
महिला मतदातासँग प्रत्यक्ष संवाद गर्दा उनीहरूका समस्या, गुनासा र सुझाव पनि संकलन गरिरहेको उनी बताउँछिन् ।
क्षेत्र नं. २ मा कांग्रेस उम्मेदवार सुरेन्द्र राज आचार्यकी श्रीमती जीवन आचार्य पनि दैनिक रूपमा घरदैलो अभियानमा सक्रिय छन् ।
तौलिहवा, इमिलिया, मर्यादपुरलगायतका क्षेत्रमा कार्यकर्ता भेटघाट र टोलसभा गर्दै उनी मत मागिरहेकी छन् ।
उनले आफ्नो श्रीमान सुरेन्द्रले विगतमा गरेका विकास निर्माणका कामलाई मतदाता सामु प्रस्तुत गर्दै फेरि पनि मत दिन मतदातासँग अनुरोध गरिरहेकी छन् ।
‘मेरो श्रीमानले क्षेत्रमाधेरै विकासका काम गर्नुभएको छ । फेरि पनि अरू काम गर्न चुनाव जिताउनुपर्ने छ, त्यसैले म पनि खटेकी छु ।’– जीवनले भनिन् । जीवनले महिला समूह, आमा समूह र युवतीहरूसँग विशेष भेटघाट कार्यक्रम राखेर महिला मतदाताको मत तान्ने प्रयास गरिरहेको बताउँछिन् ।
क्षेत्र नं. ३ का कांग्रेस उम्मेदवार अभिषेक प्रताप शाहकी श्रीमती हिमानी मिनाक्षी शाह पनि चुनावी अभियानमा उत्तिकै सक्रिय छन् । बिहान घरायसी काम सकेर उनी मतदाताको घरदैलोमा पुग्छिन् । उनी विशेषगरी महिला मतदातासँग पुगेर पतिलाई भोट माग्छिन् ।
तीनपटक सांसद हुँदा पतिले गरेका पूर्वाधार विकास, शिक्षा तथा सामाजिक क्षेत्रमा गरेका कामका विषयमा जानकारी गराउँदै हिमानीले मत दिन आग्रह गर्छिन् । स्थानीय महिला मतदाताहरूले पनि उम्मेदवारका श्रीमती प्रत्यक्ष आएर मत माग्दा उम्मेदवारप्रति विश्वास बढेको प्रतिक्रिया दिने गरेका उनले बताइन् ।
नेकपा एमालेका उम्मेदवार वीरेन्द्र कानोडियाकी श्रीमती सुलेखा कानोडिया पनि श्रीमानसँगै चुनावी मैदानमा खटेकी छन् । सुलेखाको घरदैलो बिहानैबाट सुरु हुन्छ । दिनभरि पति वीरेन्द्रसँगै हात जोडेरसँगै सुलेखाले पनि मतदातासँग भोट माग्ने गरेको उनले बताइन् ।
यसैगरी राष्ट्रिय स्वतन्त्र पार्टीका उम्मेदवार प्रकाश रजौरियाकी श्रीमती पवित्रा पराजुली रजौरियाले पनि महिला मतदातासँग पतिलाई जिताउनका लागि महिलाको टोली लिएर खटिएकी छन् । ‘मधेसका चेलीबेटी दिदीबहिनीहरू निकै पछि परेको अवस्था बुझ्न यो घरदैलोले मौका दियो ।’–उनले भनिन् ।
महिला सहभागिताले थप्यो बेग्लै रौनक
चुनावी मैदानमापुरूष उम्मेदवारका जीवनसाथीहरू सक्रिय भएपछि चुनावी माहोलमा फरक रौनक थपिएको मतदाताहरू बताउँछन् ।
घरदैलोमा महिला नेतृत्व देखिनुले महिला मतदाताको सहभागिता र उत्साह बढेको स्थानीयहरूको भनाइ छ ।
राजनीतिमा प्रत्यक्ष रूपमा नदेखिएका महिला अनुहारहरू चुनावका बेला सक्रिय रूपमा उत्रिनु सकारात्मक भएको मतदाताहरू बताउँछन् ।
परिवारको साथ र समर्थनले उम्मेदवारलाई थप ऊर्जा मिल्ने र मतदातासँग भावनात्मक सम्बन्ध पनि मजबुत हुने एमाले उम्मेदवार वीरेन्द्र कानोडिया बताउँछन् ।
