बुटवल । बुटवल–११ स्थित न्यू होराइजन इङ्ग्लिस बोर्डिङ सेकेन्डरी स्कुलमा हरिबोधिनी एकादशीको अवसर पारेर देउसी–भैलो तथा सांस्कृतिक कार्यक्रम सम्पन्न भएको छ ।
विद्यालयअन्तर्गत क्रियाशील विभिन्न विद्यार्थी क्लबहरूको संयुक्त आयोजनामा भएको कार्यक्रममा विद्यार्थीहरूले नेपाली मौलिक कला, संस्कृति र परम्पराको झल्को दिने सांस्कृतिक प्रस्तुति राखेका थिए ।
नेपाली मौलिक संस्कृति तथा परम्पराको संरक्षण र संवद्र्धन गर्ने उद्देश्यले विद्यालय प्राङ्गणमा आयोजित कार्यक्रमको सुरुवात विद्यालयको प्रतीक चिह्न अंकित आकर्षक पुष्पमण्डला (रङ्गोली) निर्माण तथा दीप प्रज्वलनबाट गरिएको थियो ।
कार्यक्रममा परम्परागत नेपाली भेषभूषा र मालामा सजिएका विद्यार्थीहरूले मौलिक देउसी–भैलोका भाकासँगै विभिन्न सांस्कृतिक नृत्य तथा गायन प्रस्तुत गरेका थिए । विद्यार्थीहरूको प्रस्तुतिले नेपाली लोकसंस्कृति, चाडपर्व र परम्पराप्रतिको सम्मान तथा पुस्तान्तरणको सन्देश दिएको थियो ।
विद्यालयका प्राचार्य वासुदेव अर्याल, उपप्राचार्यहरु राजीव श्रेष्ठ र राजेश पाण्डे तथा शिक्षक–शिक्षिका, कर्मचारी तथा विद्यार्थीहरूको सहभागिता रहेको कार्यक्रममा सांस्कृतिक प्रस्तुतिसँगै विद्यार्थीहरूबीच सामूहिक सहकार्य र सहभागिताको भावना अभिवृद्धि गर्ने अवसरसमेत जुटेको विद्यालयले जनाएको छ । विद्यालयका प्राचार्य वासुदेव अर्यालले विद्यालयले आफ्ना विद्यार्थीलाई किताबी ज्ञानमा मात्र सीमित नराखी अतिरिक्त क्रियाकलाप, खेलकुद, संस्कृति संरक्षण लगायत समाजका विभिन्न पक्षमा संलग्न गराई सर्वाङगीण विकासलाई उत्तिकै प्राथमिकता दिने गरेको बताउनुभयो ।
विद्यालयका अतिरिक्त क्रियाकलाप प्रमुख बालकृष्ण बस्यालले यस्ता कार्यक्रमले विद्यार्थीहरूलाई नेपाली मौलिक कला, संस्कृति र परम्परासँग नजिक बनाउनुका साथै सांस्कृतिक पहिचानको संरक्षणमा अभिप्रेरित गर्ने बताउनुभयो ।



