बुटवल । रोल्पा माडी गाउँपालिका-२ घर्तीगाउँ निवासी कृष्णबहादुर घर्ती मगर लुम्बिनी प्रदेशको प्रदेश प्रमुखमा नियुक्त भएका छन् ।
संघीय सरकारले लुम्बिनी प्रदेशको प्रदेश प्रमुख रहेका अमिक शेरचनलाई हटाएर कांग्रेसका पूर्व जिल्ला सभापती भएका घर्तीलाई प्रदेश प्रमुख बनाउन सिफारिस गरेको थियो ।
उनी सहित तीन प्रदेश प्रमुखलाई बुधबार राष्ट्रपति रामचन्द्र पौडेलले नियुक्त गरेका हुन् । घर्ती रोल्पा जिल्लामा दुई पटक पार्टीको जिल्ला सभापती चुनिएका थिए ।
१४ बर्ष जिल्ला सभापती भएर काम समेत गरेका उनि कांग्रेस फुट्ने बेलामा हालका पार्टी सभापती शेरबहादुर देउवा तर्फ लागेर प्रजातान्त्रीक कांग्रेसबाट जिल्लाको नेतृत्व गरेका थिए । पछी फेरी उनि पार्टी एकता पछी जिल्ला सभापती नै भए ।
१२ औं महाधिवेसनमा भएको जिल्ला अधिवेसनबाट हाल प्रदेशको सभापती रहेका अमर सिंह पुनलाई हराएर सभापतीमा निर्वाचित भएका थिए । त्यसपछी मात्रै अमर सिंह पुन जिल्लाको सभापती बन्न पाएका थिए । रोल्पा जिल्ला माओवादीको किल्ला मानिएपनि कांग्रेसको झण्डा फहराउन घर्तीमगरले मेहनत भने गरिरहे ।
सशस्त्र द्धन्द्धको समयमा पनि कांग्रेसमै टिकिरहेका उनि जनस्तरमा भिजेका नेताको रुपमा चिनिन्छन् । माओवादीलाई शान्तीप्रक्रियामा ल्याउन र बन्दुक त्यागेर शान्तीको मार्गमा ल्याउन स्थानीय स्तरमा उनले खेलेको भूमिकालाई पनि मुल्यांकनको रुपमा हेर्ने गरिएको छ ।
२०४९ सालमा गाविस अध्यक्ष भएका र हाल सम्म लाभको पदमा नगएका उनलाई यस अघिको निर्वाचनमा समानुपातिक सांसदको सूचीमा राखिएको थियो । हाल घर्तीमगरको बसाई जिल्ला सदरमुकाम लिवाङमा छ ।
