काठमाडौंबाट रसुवाको स्याफ्रुबेंसीतर्फ जाँदै गरेको एयर डाइनेष्टीको हेलिकप्टर बुधबार दिउँसो दुर्घटना हुँदा नुवाकोट शिवपुरी गाउँपालिका-७ सूर्यचौर डाँडा र गुर्जेभन्ज्याङको बिचमा दुर्घटना हुँदा पाँच जनाको निधन भएको छ । त्यसैगरी, केही दिनअघि काठमाडौंबाट पोखरा जाँदै गरेको सौर्य एयरलाइन्सको विमान उड्ने बित्तिकै दुर्घटना हुँदा १८ जनाको निधन भयो, घाइते पाइलटको उपचार भइरहेको छ ।
लगातार जसो हवाई दुर्घटना हुँदा नेपाली आकाश असुरक्षित भएको सन्देश प्रवाह भएको छ । नेपालको हवाई उडान असुरक्षित भएको सन्देश प्रवाह हुँदा राज्यका निकाय बेखबर झैं छन् । जिम्मेवार निकायले दुर्घटनाको कारण खोज्ने र त्यस्ता कमजोरी हुन नदिन पहलकदमी लिने काम गरेका छैनन् । नागरिक उड्डयन प्राधिकरणले दुर्घटना न्यूनीकरणलाई पहलकदमी लिनुपर्ने हो, त्यसैगरी दुर्घटनाले प्रवाह भएको सन्देश रोक्न पनि उत्तिकै जरुरी छ । दुर्घटना संयोगबश हुने विषय हो । चाहे सडक दुर्घटना होस् वा चाहे विमान । जुनसुकै दुर्घटना भए पनि त्यसले हुने मानवीय क्षति उत्तिकै हो । चितवनको सिमलतालमा दुई बस दुर्घटना हुँदा बेपत्ता तीन दर्जन अझैँ फेला परेका छैनन् ।
दुर्घटना भएका बसको पनि अत्तोपत्तो छैन । सडक दुर्घटनाभन्दा हवाई दुर्घटना अझँै संवेदनशील मानिन्छ । हवाई दुर्घटना भइरहँदा त्यसले अन्तर्राष्ट्रिय क्षेत्रमा प्रवाह हुने सन्देशले नेपालको पर्यटन प्रवद्र्धनमा नकारात्मक असर पर्छ । हिमाली क्षेत्रमा रहेका विमानस्थलमा ठूला जहाज जान सक्ने अवस्था छैन । ती विमानस्थल अग्ला पहाडको खोँचमा र साँघुरा छन् । ती विमानस्थलमा पर्यटक नियमित जान्छन् । नेपालको उत्तरी क्षेत्रमा पर्यटक जाने भनेको हिमाल हेर्न र उत्तरी क्षेत्रको बौद्ध संस्कृति अध्ययन गर्नका लागि हो । अर्कोतिर, मौसम पनि हवाई उडानको लागि सधैं अनुकुल छैन । तराईमा जाडोयाममा लामो समयसम्म शितलहर चल्दा विमान चल्न गा¥हो छ । पहाड र हिमाली क्षेत्रमा बर्खामास कुहिरो र बादलले हवाई उडानलाई असुरक्षित बनाइरहेको छ । संभवतः बुधबार भएको हेलिकप्टर दुर्घटना कुहिरोकै कारणले भएको हुनसक्छ ।
हवाई उडानलाई सुरक्षित बनाउन मौसमको ख्याल गर्ने र जोखिम ठानेका बेला उडान अनुमति नदिनु नै राम्रो हुन्छ । कतिपय अवस्थामा पाइलटले नै जोखिम मोलेका र कतिपय अवस्थामा यात्रुले नै पाइलटलाई उडानका लागि बाध्य पारेका दृष्टान्त बाहिर आएका छन् । हवाई दुर्घटना भएपछि छानविन टोली बनाउने गरिएको छ । टोलीले दुर्घटनाको कारण खोतल्दै प्रतिवेदन दिँदै आएको छ । विगतका प्रतिवेदनको निष्कर्ष हेरेर आगामी रणनीति बनाउन सकिन्छ । विगतका दुर्घटनाको कारण खोजेर अगाडि बढ्दा भविष्यको गन्तव्य भरपर्दो बनाउन सकिन्छ । पर्यटनबाट मुलुकको समृद्धि हासिल गर्ने लक्ष्य लिएका बेला हवाई यातायातप्रति भरोसा र विश्वास जगाउन सक्नु नै महत्वपूर्ण हुनेछ ।
