तिनाउ नदीमा मनपरी उत्खनन् गर्दा भएको गहिरो खाल्डोमा परेर एक किशोरको ज्यान गएको छ । तिलोत्तमा नगरपालिका वडा नम्बर ६ पुरानो सडकका १६ वर्षीय विद्यान्स भुसाल तिलोत्तमापार्कदेखि पश्चिमपट्टि डुबेर मृत्यु भएपछि तिनाउमा भइरहेको मनपरी उजागर भएको छ ।
तिनाउमा मनपरी अहिलेदेखि होइन । धेरै पहिलेदेखि मनपरी उत्खनन् हुँदा नदी अस्वाभाविक रुपमा गहिरिँदै गएको छ । नदी गहिरिँदा जोखिम बढेको छ । बाढी आउँदा दायाँ र बायाँ कटान बढेको छ । नदी उकास क्षेत्र बढ्दा अतिक्रमण बढेको छ । त्यही बस्ती कटानको मारमा परेको छ । मानवीय जोखिम बढेको छ । तिनाउ नदीमा भइरहेको अनियन्त्रित दोहन रोक्न पटक्कै चासो छैन । प्रहरी प्रशासन त रमिते छन् नै । स्थानीय सरकार नदी संरक्षण होइन, धेरै राजस्व असुलीको धन्दामै रमाएका छन् । नदी जोगाउँदा जीवन जोगिन्छ भन्ने मान्यतालाई आत्मसात गर्न पटक्कै चासो छैन । नदीको दोहन बहुआयामिक प्रभाव देखिन थालेका छन् ।
नदी दोहनले गहिरिँदै जाँदा त्यसका असर सतहमा देखिइसक्दा दोहन नियन्त्रणमा पटक्कै ध्यान नजानु भनेको आफ्नो खुट्टामा आफैँ बञ्चरो हान्नु हो । ठेकेदारले कति परिणामा निकाल्ने, कति क्षेत्रफलमा निकाल्ने, कति गहिराइमा निकाल्ने भन्ने प्रष्ट तोकिएको हुन्छ । मनपरी निकाल्दा भएको खाल्डो १२ फिट गहिरो भएको र त्यही खाल्डोमा जम्मा भएको पानीमा भुसाल डुबे । उनको मृत्युले ठेकेदारको मनपरी त छर्लङ्ग भएकोले यस्तो मनपरी नियन्त्रण गर्न चासो नजाने हो भने आगामी दिनमा अझैँ मनपरी बढ्न सक्छ । नागरिकको जीवन प्रधान विषय हो । अहिले डुबेर एक जना किशोरले ज्यान गुमाए । अब बर्खाको बाढीले अझँै ठूलो क्षति गर्न सक्छ ।
