तानसेन पर्यटकीय शहर हो । यो शहरमा रहेका साँस्कृतिक स्थल पर्यटकका लागि आकर्षक छन्, प्रकृतिले पनि साथ दिएको छ । श्रीनगरबाट देखिने हिमश्रृंखला र माडी फाँटतिर हेर्दा देखिने बादल र कुइरोको घुम्टो आकर्षक देखिन्छ । संस्कृति र प्रकृतिको संगम तानसेनमा पर्यटन विकासको प्रचुर संभावना हुँदाहुँदै पनि अपेक्षित लाभ लिन चुकेका छौँ ।
सेनकालीन कला संस्कृति अहिले पनि जीवन्त छ । त्यसपछि बनेका मठमन्दिरदेखि राणाकालीन संरचनाले पनि तानसेनलाई साँस्कृतिक शहरको पहिचान दिएका छन् । यहाँको नेवारी र मगर संस्कृति जीवन्त छ । लुम्बिनी प्रदेशको एकमात्र बौद्ध संस्कृति भएको शहर पनि हो यो । यहाँको मौलिक संस्कृतिलाई बजारीकरण गर्न नसक्दा तानसेनले लाभ लिन सकेन । पर्यटक भुलाउन प्रकृतिले साथ दिएको छ, संस्कृतिले साथ दिएको छ, तर पूर्वाधार विकासमा योजनाबद्ध विकासका पाइला कमजोर भए । त्यसो त केही नभएको पनि होइन । भैरवमन्दिर जीर्णोद्वार भई आकर्षक भएको छ । रानीमहल जाने सडक पक्की भएको छ । सडक पक्की हुँदा रानीमहल पुग्नेको संख्या बढिरहेको छ । पाल्पा दरबार संग्रहालय पर्यटक भुलाउने थलो भएको छ । पाल्पाली ढाका पर्यटकले लैजाने कोसेली भएको छ ।
पर्यटकीय पूर्वाधार विकासका काम गर्नुपर्ने धेरै छन् । बुटवल-पाल्पा सडक स्तरोन्नति गरी सुरक्षित बनाउनुपर्ने छ । सिद्धबाबा सुरूङमार्ग निर्माण तीब्र गर्नुपर्नेछ । तानसेन बजारबाट ग्रामीण क्षेत्रमा रहेका पर्यटकीय स्थलसम्म पुग्ने सडक भरपर्दो नहुँदा पर्यटक भुलाउन समस्या भएको छ । तानसेनमा खानेपानी सुविधा बढेको छ । यो सुविधाको सुनिश्चितता आवश्यक छ । तानसेन बौद्ध संस्कृतिको खानी हो, जहाँ भिक्षु अमृतानन्द जन्मे । बौद्ध धर्मावलम्बीका आस्थाका धरोहर अमृतानन्दको नाममा एउटा संग्रहालय, पार्क, विपश्यना ध्यान केन्द्रसहितको संरचना बनाउन सक्दा बौद्ध धर्मप्रति आस्थावानहरुको तानसेन आगमन बढाउन सकिन्छ ।
पर्यटकीय नगर तानसेनमा पर्यटक भुलाउन तहगत सरकारबीच समन्वय आवश्यक छ । तानसेन नगरपालिकाले पर्यटन गुरुयोजना बनाएर प्रदेश र संघीय सरकारसँग कार्यान्वयनका लागि पहल गर्नसक्छ । स्थानीय तहको बजेटले मात्रै गुरुयोजना कार्यान्वयन हुन नसक्ने भएकाले प्रदेश र संघीय सरकारसँग सहकार्य अपरिहार्य भएको हो ।
