सिद्धार्थनगर नगरपालिका-६ मा निःसन्तान सुखु मल्लाहलाई बाबु कायम गरी मृत्यु दर्ता र अन्य कागजात बनाएर सम्पत्ति हडप्ने प्रपञ्च गर्ने विरुद्ध छानविन गरी कारबाहीको दायरामा ल्याउनुपर्छ ।
निसन्तान सुखुको मृत्युपछि अदालतको फैसलाबाट उनको सम्पत्ति दाइ फौदार मल्लाहका छोराहरु लालजित र सन्त मल्लाहको नाममा गएको थियो । तर मिलेमतोमा फरक ठाउँमा सर्जमिन गराई भारतीय नागरिक बदल मल्लाहका छोरीहरु मालती मल्लाहीन र रिखीदेवी मल्लाहले सुखुका छोरी बनेर नागरिकता लिएका थिए । सिद्धार्थनगर–६ का लालजित र सन्त मल्लाहका बुवा फौदार हुन भने काका सुखु मल्लाह हुन् । उनीहरुका बुवा फौदारको २०७७ जेठ ८ र आमा झिनाको भने १० वर्ष अघि नै मृत्यु भइसकेको छ । काका सुखुको २०७८ असार १७ र काकी कपुतरी मल्लाहको २०७७ माघ १० मृत्यु भएको थियो ।
यसअघि नै सुखुका दाइका छोराहरुले सम्पत्ति भागबण्डा गरिसकेका थिए । तर रुपन्देही जिल्ला अदालतमा परेको मुद्दामा २०८० भदौ २६ न्यायाधीश उमेश कोइरालाको इजलासले २०१२ साल जन्ममिति रहेकी मालती मल्लाहीनलाई २००६ सालमा जन्मिएका सुखु मल्लाहको छोरी कायम भएको र अंश दिने फैसला गर्नुले नेपालकोे न्यायप्रणालीमाथि नै प्रश्न खडा गरेको छ ।
फैसलाअनुसार जग्गा रिखीदेवी र मालतीको नाममा गए सिद्धार्थनगर, सियारी र ओमसतियाको करिब १८ कठ्ठा र घर गरी साढे दुई करोड बराबरको जमिन जान्छ । बाबु छोरीको उमेरको फरक केबल ६ वर्ष हुन सक्छ ? यस्तो विवेकहिन फैसला गर्न कुन विषयले काम ग¥यो ?
पहिलो कुरा नक्कली छोरीहरुलाई नागरिकताको सिफारिश दिनेविरुद्ध छानविन हुनुपर्छ । दोस्रो नागरिकता दिने अधिकारीविरुद्ध पनि कारबाही हुनुपर्छ । अदालतको त्रुटीपूर्ण फैसला छ । यस्तो त्रुटीपूर्ण फैसला गर्ने न्यायाधीशलाई पनि न्यायपरिषद्ले अनुसन्धानको दायरामा ल्याउनुपर्छ । नेपालको न्यायप्रशासनप्रति विश्वास र भरोसा जगाउनका लागि यस्ता त्रुटी र कमजोरी गर्नेविरुद्ध कारबाही हुनुपर्छ ।
रुपन्देहीका प्रमुख जिल्ला अधिकारी गणेश अर्यालले सार्वजनिक जग्गा हडप्नेविरुद्ध केही महत्वपूर्ण निर्णय लिएका छन् । अरु कतिपय निर्णय पनि उनका उत्कृष्ट भएको भन्दै प्रंशसा भएको छ । उनकै कामले गत वर्ष रुपन्देही जिल्ला प्रशासन कार्यालय नेपालमै उत्कृष्ट हुन सफल भयो । अब यो घटनाको अनुसन्धान कसरी हुन्छ भन्ने व्यग्र प्रतीक्षा छ । यो घटनामा उनी मौन बसे भने उनीप्रति नागरिक समाजले प्रश्न उठाउने छ । नागरिकता छानविन गर्न प्रमुख जिल्ला अधिकारीको निर्णायक भूमिका हुन्छ ।
