सोमबार गौरा पर्वको अवसरमा टुँडिखेलमा सुदूरपश्चिमवासीले आयोजना गरेको कार्यक्रममा केही युवाले नेताहरूविरुद्ध चर्को नाराबाजी गरे । वहालवाला र पूर्व प्रधानमन्त्रीलगायत शीर्ष नेता उपस्थित कार्यक्रममा नाराबाजीबिच प्रधानमन्त्री केपी शर्मा ओलीले छोटो मन्तव्य दिएर हिँडे । कांग्रेस सभापति शेरबहादुर देउवा भने उल्टै संयम गुमाएर युवालाई तथानाम गाली गर्दै भाषण छोट्याएर हिँड्न बाध्य भए ।
सोमबार नै श्रीकृष्ण जन्माष्टमीको अवसरमा पाटन कृष्ण मन्दिरमा पुगेका राष्ट्रपति रामचन्द्र पौडेलविरुद्ध पनि हुटिङ भएको थियो ।
मंगलबार संसदमा समेत प्रमुख प्रतिपक्षी नेकपा (माओवादी केन्द्र)का अध्यक्ष पुष्पकमल दाहाल प्रचण्डदेखि अमरेशकुमार सिंहसम्मले जनतामा आक्रोश र निराशाको आगो बढ्दै गएको र टुँडिखेल घटना खतराको संकेत भएको बताए । यद्यपि उनीहरुको भनाइ नै अन्तिम सत्य हो भन्ने होइन ।
हुलदंगा र अराजकता फैलाउने, सामाजिक सञ्जालमार्फत् सद्भाव बिथोल्ने काम र प्रवृत्ति अनुचित छ । तर मुलुकको नेतृत्व गरिरहेका शीर्ष नेताहरुले यस प्रकारका गतिविधिलाई एकतर्फी रुपमा गलत व्याख्या गरेर उम्कन मिल्दैन । टुँडिखेलमा युवाहरूले स्वतःस्फूर्तरूपमा नेताहरुविरुद्ध वितृष्णा व्यक्त गरेका हुन् भने त्यसमा गम्भीर हुनुपर्छ ।
टुँडिखेलको घटनाबाट राज्यसँग नागरिकको अपेक्षा के रहेछ भनेर बुझ्नुपर्ने हुन्छ । लोकतन्त्रमा नागरिकमा देखिएको गुनासो, विरोध र असन्तुष्टिलाई सुरक्षाकर्मी लगाएर निस्तेज गर्न सकिँदैन । गर्नु पनि हुँदैन । तर, राज्यले सुक्ष्म अनुगमन गरेर आमनागरिकको अपेक्षा के हो भनेर पहिचान गर्नुपर्छ । विपक्षीले पनि उत्तेजकभन्दा समस्या के हो भनेर सरकारलाई देखाइदिनुपर्छ । यस्ता समारोहमा फरक राजनीतिक दलले घुसपैठ गर्न सक्छन् । तर, सत्ता चलाउने व्यक्ति र नेताले कुनै व्यक्ति तथा दललक्षित भनेर बुझ्नुहुँदैन । आमजनताको आक्रोश हो भनेर बुझ्दा समस्या पहिचान र हल गर्न सकिन्छ ।
कुनै विरोध र असन्तुष्टि आउनेबित्तिकै अराष्ट्रिय तत्व र घुसपैठ भनिदिँदा समस्या पहिचानमा चुकिन्छ । नागरिकले असन्तुष्टि देखाउनु सचेत हुने र सरकार सच्चिने मौका पनि हो । टुँडिखेलमा सोमबार भएको प्रदर्शनलाई नागरिकको सरकारसँग अपेक्षा रहेछ भनेर बुझ्नुपर्छ । पाटनमा राष्ट्रपति तथा टुँडिखेलमा प्रधानमन्त्री र पूर्वप्रधानमन्त्रीप्रति भएको हुटिङ र नाराबाजीप्रति सुरक्षा निकायले समेत सूक्ष्म अध्ययन गरी यथार्थ पत्ता लगाउनुपर्छ ।
नागरिक आक्रोशलाई गाली गरेर, हल्कारुपमा लिएर होइन, सरकार सञ्चालन गर्नेहरुले यावत समस्याको समाधानको आशा र विश्वास दिलाएर मात्रै भविष्यमा दोहोरिन नदिने गरी काम गर्नुपर्छ । नागरिकका असन्तुष्टी र आक्रोशको अन्तर्यको सही पहिचान गरेर सम्बोधन गर्न सके मात्रै यस्ता आक्रोशहरु दोहोरिने छैनन् ।
