प्रहरीको व्यवसायिक आचरण र व्यवहारप्रति प्रश्न उठिरहेको बेला स्वंय प्रहरी प्रमुख बसन्त कुँवर नै सन्तुष्ट नभएको बताएका छन् । गैरव्यवसायिक आचरणले प्रहरी बदनाम भएको भन्दै उनले आचरण सुधारका लागि लाग्न निर्देशन दिएका छन् ।
प्रहरी र नागरिकबीचको सम्बन्ध नङ र मासुझैं हो । नागरिकसँगको सहकार्य र विश्वासबाट नै प्रहरी सफल हुने हो । प्रहरीको सक्रियता र इमान्दार प्रयासबाट मात्रै नागरिकले शान्ति सुरक्षाको अनुभूति गर्ने हो । प्रहरीप्रति नागरिकको अपेक्षा चुलिएको र चुलिएका अपेक्षा पूरा गर्न प्रहरीको सक्रियता बढ्नुपर्ने बेला गैरव्यवसायिक आचरणबारे समाजमा खुलेर छलफल हुन थालेको छ । समाजमा भइरहेको छलफललाई प्रहरी प्रमुखले सार्वजनिक मञ्चबाटै सुधारका लागि निर्देशन दिएका छन्, जुन प्रहरी संगठन सुधारका लागि गतिलो अवसर हो । कतिपय प्रहरी लामो समयदेखि एउटै कार्यालयमा बसिरहेका छन् । सत्ता र शक्तिको प्रयोग गरी तराई र सिमावर्ती प्रहरी युनिटमा बस्न खोज्नेको चाप छ । यस्तो चाप हुनुको कारण हो, अतिरिक्त आय । अहिले ११ सय प्रहरी निरीक्षक सीमा क्षेत्रमा जान खोजिरहेको र त्यस्तो हुनु स्वार्थ लुकेको प्रहरी प्रमुखले सार्वजनिक मञ्चबाटै बताए ।
रूपन्देही जिल्ला प्रहरी कार्यालयको भवन उद्घाटनका अवसरमा सिद्धार्थनगर नगरपालिका प्रमुख इस्तियाक अहमद खानले ट्राफिक प्रहरीबाट धेरै दुःख पाएको गुनासो गरेपछि प्रहरी प्रमुखले आचरण र व्यवहार सुधारका लागि मातहतको युनिटको ध्यानाकर्षण गराएका छन् । गल्ती गर्नेलाई कारबाही गर्नेको दायरामा ल्याउने र प्रहरीलाई अवाञ्छित राजनैतिक हस्तक्षेपबाट मुक्त गर्न ध्यान दिनुपर्छ ।
अहिले प्रहरी संगठन कमाण्ड कन्ट्रोल बाहिर जान थालेको संकेत देखिएको छ । विभिन्न मुद्दा र अभियोगको अनुसन्धान प्रहरी प्रमुखकै जानकारीमा हुन छाडेको विषय सार्वजनिक भएको छ । संगठनभित्रै राजनैतिक नेतृत्वसँग हिमचिम बढाएर प्रहरी प्रमुखलाई चुनौती दिन खोज्ने प्रवृत्तिले कमाण्ड कन्ट्रोलमा समस्या ल्याउँछ । प्रहरी संगठनका लागि यस्तो प्रवृत्ति जति जोखिम छ, राजनैतिक नेतृत्वका लागि पनि उत्तिकै समस्या छ । प्रहरी संगठनभित्र अराजकता बढ्दै जाँदा त्यसले समाजमा झनै अराजकता मौलाउँछ भन्ने विषय हेक्का हुुनुपर्छ ।
प्रहरी प्रमुखले प्रहरी संगठन सुधारका लागि आचरण र व्यवहार सुधारको निर्देशन सकारात्मक नै छ । अब प्रहरी संगठनलाई थप बिग्रन नदिन राजनैतिक हस्तक्षेपलाई एउटा सिमासम्म राख्ने आँट प्रहरी नेतृत्वले राख्न सक्नुपर्छ ।
