बुटवल । लुम्बिनी प्रदेश सरकारकोे गौरवको आयोजना लुम्बिनी प्रादेशिक अस्पताल भवन निर्माणको शिलान्याश उपप्रधान तथा अर्थमन्त्री विष्णु पौडेलले शनिवार गर्दैछन् ।
विशेषज्ञ सेवा उपलब्ध गराउने गरी लुम्बिनी प्रादेशिक अस्पतालको अत्याधुनिक भवन ६ अर्ब १८ करोड रुपैयामा निर्माण हुन लागेको हो । लुम्बिनी प्रदेशका संस्थापक मुख्यमन्त्री शंकर पोखरेलले बुटवलको लुम्बिनी प्रादेशिक अस्पताल र तुलसीपुरको राप्ती प्रादेशिक अस्पताललाई विशेषज्ञ सेवा उपलब्ध गराउने गरी 'ड्रिम प्रोजेक्ट’को रुपमा अघि सारेका हुन् । पोखरेलले अघि सारेको त्यही 'ड्रिम प्रोजेक्ट’ अन्तर्गत लुम्बिनी प्रादेशिक अस्पतालको डिपिआर तयार भइ ठेक्का समेत भइसकेको छ भने राप्ती प्रादेशिक अस्पतालको डिपिआर तयार भएको छ । 'राप्तीको इआइए हुँदैछ, —प्रदेश पूर्वाधार विकास प्राधिकरणका प्रमुख छविराज पोखरेलले भने ।
लुम्बिनी प्रादेशिक अस्पतालमा सबै प्रकृतिका बिरामीले विशेषज्ञ उपचार सेवा उपलब्ध गराउने गरी पूर्वाधार निर्माण गर्न लागिएको हो । यो अस्पताल प्रदेश सरकारको आर्थिक स्रोतमा बन्न लागेको पहिलो ठूलो संरचना हो । प्रदेश सरकारअन्तर्गतको पूर्वाधार विकास प्राधिकरणले तयार गरेको गुरुयोजना अनुसार अस्पतालको भवन १० तलाको हुनेछ । पाँच तलाको क्यान्सर उपचारको छुट्टै भवन हुनेछ । १० तलाको भवना दुई तलाका अन्डरग्राउन्ड पार्किङ हुनेछ । भने पाँच तलाको भवनमा एक तला अन्डरग्राउण्ड पार्किङ हुनेछ ।
दुई भवन र त्यसका उपकरण, आन्तरिक व्यवस्थापनमा सरकारले ८ अर्ब ९९ करोड ७५ लाख ६४ हजार १ सय ९९ रुपैयाँ लागत अनुमान गरेको छ । त्यसमा एक भारतीयसहित दुई नेपाली कम्पनीसँग संयुक्त रूपमा ५ वर्षभित्र काम सक्ने गरी ६ अर्ब १८ करोड रुपैयाँमा सम्झौता भएको छ । नयाँ भवनको अगाडिको भागमा अत्याधुनिक बहिरंग सेवा ओपीडी, आपतकालीन उपचार, इमर्जेन्सी र इन्डोर सर्भिस कक्षसहित १२ सय बेड रहने छन् । साथै विशिष्टीकृत ग्यास्ट्रो, न्युरो, कार्डियोलोजीलगायतका सबै विशेषज्ञ सेवा एउटै भवनबाट उपलब्ध हुनेछन् ।
पूर्वाधार विकास प्राधिकरण दाङका प्रमुख इन्जिनियर पोखरेलले ‘क्याम्पासाइट-आशिष-रेलिगेर’ संयुक्त कम्पनीसँग ठेक्का सम्झौता भएको जानकारी दिए । क्याम्पासाइट भारतीय प्रतिष्ठित निर्माण कम्पनी हो । आशिष र रेलिगेर नेपाली कम्पनी हुन् ।
ठेक्का प्रक्रियामा यस अघि दुईपल्ट टेण्डर आव्हान भएको थियो तर ठेक्का प्रक्रिया विवादास्पद भएपछि रद्द गरिएको थियो । भवन निर्माण मापदण्डको ‘स्पेसिफिकेसन’मै आशंका भएपछि दुवै टेन्डर रद्द गरिएको थियो । तेस्रोपल्टमा आव्हान भएको टेण्डर स्विकृत भइ काम अघि बढेको हो ।
सरकारले चालु आवमा भवन निर्माणका लागि १ अर्ब ८० करोड रुपैयाँ विनियोजन गरेको छ । गत आवमा ७० करोड रुपैयाँ विनियोजन गरेको थियो । प्रदेश गौरवको आयोजना भएको र यो आयोजना महत्वपूणर् भएकाले रकम अभाव हुन नदिने मुख्यमन्त्री चेतनारायण आचार्यले बताए ।
निर्माण कम्पनीले ठेक्का स्विकृत भए लगत्तै काम शुरु गरिसकेको छ । अहिले अस्पताल परिसरका पुराना संरचना हटाउने काम सम्पन्न भएको छ ।
राणा प्रधानमन्त्री चन्द्रशमशेरका पालामा १९६७ सालमा ६ बेडको अस्पताल निर्माण गरेकामा २०२४ सालमा ५० बेडमा विस्तार भएको थियो । २०५० सालमा १ सय बेडमा विस्तार भएको अस्पतालमा २०७२ सालबाट सरकारबाट ३ सय र विकास समितिबाट १ सय बेड गरी ४ सय बेडमा स्तरोन्नति भएको थियो । अहिले ५ सय २४ बेडमा बिरामीको उपचार भइरहेको छ ।
अस्पतालबाट अहिले बहिरंग सेवातर्फ जनरल मेडिसिन, न्युरो मेडिसिन, कार्डियोलोजी, अर्थोपेडिक सर्जरी, जनरल सर्जरी, प्लास्टिक सर्जरीसहित १७ भन्दा बढी विभागीय सेवा सञ्चालनमा छन् । परीक्षणतर्फ प्याथोलोजी, एक्स-रे, सिटी स्क्यान, अल्ट्रासाउन्ड, इन्डोस्कोपी, क्लोनोस्कोपी, ईईजी, ओपीजी, इकोकार्डीओग्राम लगायतका सेवा उपलब्ध छन् । सबै उपचारका लागि ७४ विशेषज्ञ डाक्टरसहित ६ सय बढी स्वास्थ्यकर्मी कार्यरत छन् ।
सुधार हुँदै सेवा
२०७६ साउनमा लुम्बिनी प्रदेशसभाको सामाजिक विकास समितिले स्थलगत अध्ययन गरी लुम्बिनी प्रादेशिक अस्पताल अस्तव्यस्त रहेको निष्कर्ष निकालेको थियो । तर अहिले अस्पतालको सेवाप्रवाहमा उल्लेख्य सुधार आएको छ । आब २०७८।०७९ मा ७४ अंक ल्याएको लुम्बिनी प्रादेशिक अस्पतालको उकालो यात्रा निरन्तर अघि बढेको छ ।
आब २०७९।०८० मा ८० अंक ल्याएको यो अस्पतालले आब २०८०।०८१ मा ८८ अंक ल्याउन सफल भयो । लुम्बिनी प्रादेशिक अस्पतालमा पहिले ८ शैया रहेको बच्चाको आइसियु अहिले ३३ शैया पुगेको छ । बयस्कका लागि ६ शैया रहेको आइसियु अहिले २६ शैया पुगेको छ ।
