विशिष्टिकृत अस्पतालको रुपमा विकास गर्ने गरी लुम्बिनी प्रादेशिक अस्पतालको पूर्वाधार निर्माणको काम सुरु भएको छ । अस्पतालको सुविधासम्पन्न भवन निर्माणको शनिबार उपप्रधान तथा अर्थमन्त्री विष्णु पौडेलले शिलान्यास गरेका छन् । अस्पताल भवन निर्माण भएपछि उपकरण र विशेषज्ञ डाक्टरको व्यवस्थापन गर्न सक्दा यो काठमाडौं बाहिरको महत्वपूर्ण अस्पताल हुनेछ ।
लुम्बिनी प्रादेशिक अस्पताललाई विशिष्टिकृत अस्पताल बनाउन प्रदेशको ‘ड्रिम प्रोजेक्ट’को रुपमा लुम्बिनी प्रदेशका संस्थापक मुख्यमन्त्री शंकर पोखरेलले अघि सारेको आयोजना हो । प्रदेश सरकारले राप्ती प्रादेशिक अस्पताल तुलसीपुर र लुम्बिनी प्रादेशिक अस्पताल बुटवललाई विशिष्टिकृत अस्पतालको रुपमा विकास गर्न सक्दा प्रदेशको स्वास्थ्य सेवाको गुणस्तर बढाउन सकिन्छ भन्ने निष्कर्ष निकालेर योजना कार्यान्वयनमा अघि बढ्नु नेतृत्वको दुरदर्शीता हो । अहिले विशेषज्ञ सेवाको लागि काठमाडौं, भारतको गोरखपुर, लखनऊ र दिल्ली पुग्नुपर्ने बाध्यता छ । यो अस्पताल भवनको निर्माणपछि कतिपय अवस्थामा बाहेक सबै सेवा यही उपलब्ध हुनसक्यो भने नागरिकलाई ठूलो राहत हुनेछ । दुईपल्ट ठेक्का आव्हान भएपछि प्रक्रियागत त्रुटीले विवाद भएपछि तेस्रो पल्टको ठेक्का टुंगो लागेको हो । ६ अर्ब १८ करोड रुपैयाँमा क्याम्पासाइट–आशिष–रेलिगेरसंयुक्त कम्पनीसँग ठेक्का सम्झौता भएको छ । क्याम्पासाइट भारतीय प्रतिष्ठित निर्माण कम्पनी भएको र नेपाली कम्पनी आशिष र रेलिगेर पनि राम्रै कम्पनी भएकाले उनीहरुले गुणस्तरीय काम गर्छन् भन्ने विश्वास छ । यद्यपी निर्माण कम्पनीले गर्ने कामको निगरानी सरकारी संयन्त्रले चुस्त ढंगले गर्ने छ नै, नागरिक तहबाट समेत निगरानी आवश्यक छ ।
विकास आयोजना समयमा सम्पन्न हुनुपर्छ, गुणस्तरीय काम हुनुपर्छ र तोकिएको बजेट सीमामै काम हुनुपर्छ । आयोजना समयमा नसकिने प्रवृत्ति मौलाएको छ । गुणस्तर र बजेट सीमालाई पनि बेवास्ता गर्ने प्रवृत्ति उत्तिकै छ । यसले आयोजनाप्रति नागरिकको अपनत्व र विश्वास कमजोर भएको छ । लुम्बिनी प्रादेशिक अस्पताल भवनका लागि चालु आवमा प्रदेश सरकारले १ अर्ब ८० करोड रुपैयाँ विनियोजन गरेको छ । पाँच वर्षभित्र काम सक्ने लक्ष्य भए पनि तीन वर्षभित्रै काम सक्ने योजना रहेको प्रदेश पूर्वाधार प्राधिकरणका अधिकारीहरुको भनाइ रहेको छ । समयसीमाभित्रै आयोजना पूरा नहुँदा समाजमा धेरै समस्या देखिन्छ । लुम्बिनी प्रादेशिक अस्पताल भवन तोकिएको समयसीमाभन्दा अघि नै सम्पन्न हुन सक्यो भने यसले नयाँ सन्देश दिने छ ।
