वातावरण नभएको भन्दै व्यवसायीहरू लगानी गर्न हच्किरहेका बेला एक जना व्यवसायीले फर्निचर उद्योगमा गरेको लगानीले आयात प्रतिस्थापन गर्न सफल भएको छ । जतिबेला कोभिड महामारी थियो, व्यापार व्यवसाय बन्द थिए, कोभिड त्रासले समाज गुज्रेको थियो । त्यसैबेला बुटवलको आवास गु्रपले फर्निचर उद्योगमा लगानी गर्ने निर्णयले अहिले आयात प्रतिस्थापन गर्न सफल भएको छ ।
बजारमा चिनियाँ र भारतीय फर्निचरको दबदबा छ । तीमध्ये चिनियाँ फर्निचरले बजारको ठूलो हिस्सा ओगटेको छ । नेपाली बजारमा चिनियाँ फर्निचरको दबदबा त छ, तर गुणस्तरमा समस्या छ । राम्रो डिजाइन भएका चिनियाँ फर्निचरप्रति आकर्षित भए पनि गुणस्तरप्रति उपभोक्ताको गुनासो छ । उपभोक्ताले गुणस्तरीय फर्निचर खोजिरहेका बेला आवास गु्रपले रूपन्देहीको देवदह भलुहीमा आवास स्टिल एण्ड फर्निचर उद्योग खोल्यो । आज आवास फर्निचरले डिजाइन, फिनिसिङ, गुणस्तर र मूल्यमा चिनियाँ फर्निचरलाई टक्कर दिन सफल भएको छ । नेपाली फर्निचर पनि अब्बल हुन्छन् भन्ने स्थापित भएको छ ।
कुनै पनि उत्पादनले बजार लिनसक्नु केबल गुणस्तरीय भएर मात्रै हुँदैन, उद्योगले लिने बजार रणनीति पनि आवश्यक पर्छ । प्रतिस्पर्धी बजारमा टिक्नका लागि संभावित रणनीति, जोखिम र संभावनाका बारेमा प्रष्ट हुन आवश्यक छ । आवास गु्रपका तेस्रो पुस्ताका युवा निर्माण थैवले तयार गरेको यो रणनीतिलाई कार्यान्वयन गर्न अनुभवी अग्रजले सघाए । नयाँ पुस्ताको अवधारणालाई कार्यान्वयन गर्न अनुभवी पुस्ता सघाउन तयार भएकाले अहिले आवास फर्निचरले बजार लिन सफल भएको हो । रूपन्देहीको भलुहीको उद्योग काठमाडौंमा पनि विस्तार हुँदैछ । काठमाडौंको ठूलो बजारमा पु¥याउन यहाँबाट छरितो नहुँदा उतै उद्योग खोल्नु स्वाभाविक पनि हो । २०७८ सालमा स्थापना भएको उद्योगले नेपाल सरकार, उद्योग मन्त्रालयबाट उत्कृष्ट नवप्रवर्तनकारी उद्योगमा छनोट भइ यो वर्ष पुरस्कृत भएको छ ।
अहिले समाजमा चौतर्फी निराशा छ, देशमा संभावना छैन, अवसर छैन भन्ने गुनासो धेरै सुनिन्छ । तर यो निराशालाई चिर्न सरकारले अवसर छ भन्ने सन्देश दिन युवाहरूलाई स्वदेशमै उद्यम व्यवसाय गर्न प्रेरित गर्नुपर्छ । जसले गरेका छन्, उनीहरूलाई थप लगानी गर्न हौस्याउनुपर्छ ।
