नवलपुर
पूर्व–पश्चिम राजमार्गअन्तर्गत नारायणगढ–बुटवल सडक खण्डको काममा ढिलासुस्ती भएको भन्दै नवलपुरको गैँडाकोटमा स्थानीयले सोमबार चक्काजाम गरेर विरोध जनाएका छन् ।
सडक विस्तार तथा मर्मतमा भएको ढिलासुस्तीका कारण यात्रु र स्थानीयले दुःख पाएको भन्दै स्थानीय आन्दोलित भएका हुन् ।
गैँडाकोट २ पुलचोक नजिक इलाका प्रहरी कार्यालय गैँडाकोट अगाडि स्थानीयले करिब १ घण्टा चक्काजाम गरेका हुन् । उनीहरुले चाडपर्व नजिकिँदा समेत सडक मर्मतमा कुनै चासो नदिएको उल्लेख गर्दै टायर बालेर विरोध गर्दै सडक अवरुद्ध गरेका हुन् । छिटो काम गर्न दबाब दिनका लागि सडक अवरुद्ध गरिएको स्थानीयहरुले बताएका छन् । उनीहरुले बिहान ११ बजेदेखि १ घण्टा चक्काजाम गरेका हुन् ।
होटल व्यवसायी कमल गौतमले सडकमा हिँड्ने मात्रै नभइ पसलमा बस्नेहरुलाई पनि असर गरिरहेकोले बाध्यताले चक्काजाम गर्नु परेको बताए । लामो समयसम्म पनि व्यवसायको अगाडि ठूला ठूला खाल्डो खनेर अलपत्र पारेको उनको भनाइ थियो ।
गैँडाकोट २ का वडाध्यक्ष प्रकाश सापकोटाले निर्माण पक्षलाई पटक–पटक आग्रह गर्दा पनि अटेर गरेका कारण सडकमा उत्रनु परेको बताए ।
प्रहरी निरीक्षक हस्तबहादुर सुनारले सडक निर्माण पक्षलाई बोलाएर छलफल गराउने आश्वासन दिएपछि अवरुद्ध सडक स्थानीयले खोलेका थिए ।
सामान्य पानी पर्दा पनि यहाँ अन्य क्षेत्रको पानी समेत बगेर आउने भएकोले हिलाम्य हुने गरेको छ भने घाम लाग्दा धुलाम्य हुने गरेको छ । हिलो हुँदा पनि सडक मर्मत नगर्ने तथा घाम लाग्दा पानी समेत नहाल्ने गरेको स्थानीयले बताउँदै आएका छन् ।
