यतिखेर विकास निर्माणका काम तीब्र भएको देखिन्छ । यसो हुनुको कारण हो, आर्थिक वर्षको अन्त्यतिर काम गर्ने प्रवृत्ति । आर्थिक वर्षको सुरुदेखि काम सुस्त गर्ने तर अन्त्यतिर भुक्तानी लिनका लागि हतार-हतार सक्ने प्रवृत्ति हट्न सकेको छैन । बजेट समयमै आउँदा समेत योजना कार्यान्वयनको पाटो फितलो बन्दा समस्या ज्यूँका त्यूँ छ ।
तर कतिपय पालिकाले समयमै बजेट कार्यान्वयनलाई व्यवहारमा उतार्ने प्रयास गरेका छन् । पाल्पाको वगनासकाली गाउँपालिका असारे विकासबाट मुक्त भएको खबर सार्वजनिक भएको छ । बगनासकाली गाउँपालिकाले तर्जुमा गरेका आन्तरिक, प्रदेश तथा संघीय सरकारका साझेदारी योजनाको काम बैशाख १५ सम्म सक्काएर जेठ १५ सम्म पैसा प्राप्त भएको सबै भुक्तानी दिइसकेको छ । विनियोजन भएको बजेटका सबै योजना कार्यान्वयन भएका र भुक्तानी समेत भइसकेकाले जनप्रतिनिधि र कर्मचारीहरु आगामी वर्षको बजेट, नीति, कार्यक्रम तथा योजना निर्माणमा जुटेका छन् । गाउँपालिकाले ९ वटै वडाहरुमा एक वडा एक प्राविधिक परिचालन, वडा—वडामै पुगेर योजनाहरु सम्झौता, वडाकै प्राविधिकहरुबाट योजनाहरुको अनुगमन, मूल्याङ्कन जस्ता कामहरु बैशाखभित्रै सकेको बताइएको छ । वडा कार्यालयबाटै योजनाको सम्झौतालगायतका काम पूरा गरी भुक्तानीको लागि मात्रै पालिका केन्द्रमा पेश गर्ने व्यवस्था गर्दा काम छिटो छरितो भएको छ ।
नीति निर्माण र कार्यान्वयनमा कर्मचारी र जनप्रतिनिधिको तालमेल मिल्नु नै प्रधान हो । जनप्रतिनिधिले विधि बसाल्न प्रेरित गर्ने र कर्मचारीले त्यसलाई लागू गर्ने हो भने बिग्रेको थिति राम्रो बन्छ भन्ने बगनासकालीको यो उदाहरण काफी छ । जनप्रतिनिधिले विधिलाई ध्यान नदिएर अनावश्यक कर्मचारीलाई दबाब दिने प्रवृत्ति छ । यही प्रवृत्तिले स्थानीय तहमा कर्मचारी खटिन मानिरहेका छैनन् । बगनासकाली गाउँपालिकाका प्रमुख सरस्वती चिदीले विधिलाई स्थापित गर्न गरेको प्रयास प्रशंसनीय छ ।
स्थानीय तहमा अधिकार पुग्यो तर अधिकारको सही प्रयोग नहुँदा समस्या चुलिएका छन् । दुरुपयोग बढेका उदाहरण आएका छन् । बगनासकालीले गरेको यो सकारात्मक पहललाई अरु पालिकाले अनुसरण गर्ने हो भने पालिकाका कामप्रति नागरिकको विश्वास र अपनत्व बढ्दै जान्छ । नागरिकको अपनत्व र विश्वासले नै शासन प्रणाली संस्थागत हुँदै जाने हो ।
