बुटवल उप–महानगरपालिका वडा नम्बर ८ को वडाध्यक्ष यज्ञप्रसाद पंगेनी छन् । गएको निर्वाचनमा नेपाली कांग्रेसबाट चुनिएका पंगेनी खुलस्त छन् । सरल स्वभावका उनी समुदायमा भिजेका जनप्रतिनिधि हुन् । बुटवलको घना बस्ती भएको सुख्खानगर क्षेत्र पर्ने वडा नम्बर ८ मा के–कस्ता विकास निर्माणका काम भए ? के काम अघि बढ्दै छन् ? नागरिकको चाहना के रहेछन् ? भन्ने बारेमा वडाध्यक्ष पंगेनीसँग गरेको कुराकानी :
तपाईं निर्वाचित भएर आएको दुई वर्ष नाघेको छ, चुनावमा गरेका प्रतिबद्धताअनुसार के-के काम अघि बढाउनुभएको छ ?
म निर्वाचित भएर आएपछि उदाहरणनीय काम स-साना बाटो को नाङ्गा तार हटाइएकोमा जनता खुशी छन् । साथै परासी गएको ३३ केभिए हाइटेन्सन हटाइएको छ । विद्युत पोल नयाँ गाडिएको छ । तार व्यवस्थापन भइसकेको छ । विद्युत्को कमजोर भोल्टेजलाई सुधार गरिएको छ । यी कामले वडावासीलाई फाइदा पुगेको छ । सडकमा हरियाली बनाएका छौं । जेब्राक्रस व्यवस्थित गरिएको छ । खानेपानीको व्यवस्थापनलाई सहज गराउन ७ किमी पाइप बिस्तार गरेका छौं, गेटबल राखेर खानेपानीको सुविधा बढाएका छौं । मिलनचोकमा सडक फराकिलो गर्यौ । छाडा कुकुरहरूलाई रेबिज सुइ र बन्द्याकरण गर्ने काम नियमित गरेका छौं । गरिब विद्यार्थीलाई पोसाक वितरण, खेलकुद सामग्री वितरण गरेका छौं । वडाको दुई ठाउँमा वाइफाइ फ्रि गराएका छौं । अब निःशुल्क शुद्ध पिउने पानीको मेसिन राख्ने र एउटा शौचालय बनाउन जग्गा खोजी गरिरहेका छौं । विद्यालय वरिपरि सन्देशमूलक बोर्ड र गति सीमित बोर्ड र समय तोक्ने जस्ता काम गरेका छौं ।
मिलनचोकदेखि पूर्वतिर जाने सडक विस्तारको काम कसरी अघि बढ्दैछ ?
मिलनचोकको बाटोमा भवन मापदण्ड विपरीत बनेका दर्जन घर छन् । ती खाली गर्न शहरी पूर्वाधार विकासले का मअघि बढाएको छ । टोल समितिको सहयोगमा काम अघि बढ्दै छ । हामीले टोल समितिलाई घर टहरा खाली गर्ने काममा सहयोगी बन्न अग्रसर गराएका छौं ।
गत आबमा कुन कुन योजना सम्पन्न भए, यो वर्ष कुन कुन योजना अघि बढ्दैछन् ?
गत आब मा बिजुली, पानी सडक पूर्वाधारको काम ग¥यौं । र खुल्ला व्यायामशाला बनायौं । नागरिकलाई शारीरिक स्वास्थमा पहुँच पुगोस् भनेर व्यायामशाला राखेका हौं ।
उप–महानगरपालिकाले के गर्न सक्दा वडा कार्यालयको काम प्रभावकारी हुनसक्छ ?
उप–महानगरपालिकाले सक्दो सेवा प्रवाह गर्न करको दायरा बढाउनुपर्छ, तर करको प्रतिशत घटाउनुपर्छ । युवा युवतीलाई प्रोत्साहन, तालिमतर्फ उत्प्रेरित गर्नुपर्छ । बजार अनुगमन प्रभावकारी बनाउनुपर्छ । बजार अनुगमन गर्दा सबै क्षेत्र समेट्नु पर्छ । राहत प्याकेज दिँदा सबै क्षेत्र समेट्नु पर्छ ।
वडालाई बजेट सिलिङ बढाउने, राजस्व कम उठाउनेलाई सोहीअनुसार बजेट घटाउने बढाउने गरेमा वडाको काम प्रभावकारी हुन्छ ।
साथै कर्मचारीलाई प्रोत्साहित गर्ने हौसला दिने सेवा राम्रोसँग दिनेलाई नजिक र लापरबाही गर्नेलाई सोहीअनुसार गर्ने हो भने आम नागरिक खुसी हुने देखिन्छ । सबैलाई मुस्कानको सेवा दिने हो भने नगर प्रमुख वडाध्यक्षहरु सफल र बुटवल समृद्ध बन्छ ।
तपाईंको वडामा नागरिकका समस्या र चाहना के–के पाइए ?
नागरिकले छिटोछरितो सेवा खोजिरहेका छन् । जनप्रतिनिधि शासक होइन, सेवक हुुनपर्छ भन्ने मान्यतालाई व्यवहारमा खोजिरहेका छन् । वडामा साना-साना समस्या बढेर ठूला बन्ने हुँदा बेलैमा समस्या समाधान खोजेका छन् । स-साना समस्या भनेर बेवास्ता गर्दा त्यसले विवाद बढ्दै जादा विवाद बढाउने भएकाले हामी चनाखो हुनुपर्ने ठानेका छौं । नागरिकको चाहना र भावना बुझेर हामी काम गर्ने प्रयास गरिरहेका छौं ।
