(अर्घाखाँचीको शीतगंगा नगरपालिका–९ का वडाध्यक्ष भिमबहादुर केसीसँग पत्रकार अनिल नेपालीले गरेको कुराकानीको सम्पादित अंशः 

तपाईं निर्वाचित भएपछि वडाको विकास कसरी अघि बढाइरहनुभएको छ ? वडामा मुख्य समस्या के थिए ?
म निर्वाचित हुनुअघि शीतगंगा–९ मा विकासका पूर्वाधार निकै कमजोर थिए। एउटा गाउँबाट अर्को गाउँमा पुग्ने बाटोसम्म सहज थिएन। निर्वाचित भएपछि भौतिक पूर्वाधारसँगै शिक्षा, स्वास्थ्य, खानेपानी, रोजगारी, पर्यटन र विद्युत्लाई प्राथमिकतामा राखेर काम गरिरहेका छौं ।
सुरुवातमा हाम्रो मुख्य ध्यान सडक निर्माण र सुधारमा रह्यो । वडाको ठूलो भूगोल र विकटताका कारण सबै बस्तीमा सडक पहुँच पु¥याउनु चुनौतीपूर्ण थियो । अहिले वर्षायामबाहेक अन्य समयमा वडाका अधिकांश स्थानमा गाडी पुग्ने अवस्था बनेको छ । खानेपानी, विद्युत् र घरघरमा आधारभूत सेवा पु¥याउने काम पनि अघि बढिरहेको छ ।
तपाईंको कार्यकालमा कुन–कुन क्षेत्रलाई प्राथमिकता दिनुभयो ?
शिक्षातर्फ पहिले रहेका १० वटा सामुदायिक विद्यालय अहिले ११ वटा पुगेका छन् । आधारभूत तहका विद्यालयलाई क्रमशः सुधार गर्दै माध्यमिक शिक्षाको पहुँच विस्तार गरेका छौं । पाखुरी माध्यमिक विद्यालय र लौरी माध्यमिक विद्यालयमा कक्षा १० सम्मको पढाइ सञ्चालन भइरहेको छ ।
स्वास्थ्य सेवामा पनि सुधार गरिएको छ । स्वास्थ्य चौकीबाट टोल–टोलमा घुम्ती सेवा, ज्येष्ठ नागरिकलाई औषधि वितरण, सुत्केरी महिलालाई पोषणसम्बन्धी सहयोग तथा विभिन्न स्वास्थ्य शिविर सञ्चालन गर्दै आएका छौं ।
पर्यटन प्रवद्र्धनका लागि नयाँ गन्तव्य पहिचान गर्ने र भएका पर्यटकीय क्षेत्रको विकास तथा प्रचार गर्ने काम पनि भइरहेको छ ।
स्थानीय सरकार आएपछि भ्रष्टाचार र अनियमितता बढेको गुनासो सुनिन्छ नि ?
३५ वर्षमा केही भएन भन्ने होइन, विकास निर्माण र सामाजिक क्षेत्रमा धेरै परिवर्तन भएका छन्। तर जनताको अपेक्षा अझै ठूलो छ । मेरो कार्यकालमा भ्रष्टाचार हुन नदिने विषयमा म प्रतिबद्ध छु ।
भ्रष्टाचार नियन्त्रण केवल एउटा व्यक्तिले गरेर सम्भव हुँदैन । भ्रष्टाचार गर्ने र गराउने दुवैको मानसिकता परिवर्तन आवश्यक छ । जनताका गुनासा सुनेर कर्मचारीलाई पारदर्शी र जिम्मेवार ढंगले सेवा प्रवाह गर्न प्रेरित गर्दै आएको छु । जनतालाई छिटो, छरितो र प्रभावकारी सेवा दिने मेरो प्राथमिकता हो ।
आगामी दिनमा वडालाई कस्तो बनाउने योजना छ ?
खानेपानी, शिक्षा, स्वास्थ्य र सडकजस्ता आधारभूत क्षेत्रमा थप स्तरोन्नति गर्ने योजना छ । कृषि र पर्यटनलाई व्यावसायिक बनाउँदै स्थानीयस्तरमै रोजगारी सिर्जना गर्ने लक्ष्य छ ।
विशेषगरी युवालाई व्यावसायिक कृषिमा आकर्षित गरी स्वरोजगार बनाउने योजना छ । महिला, बालबालिका, दलित, असहाय तथा अपांगता भएका व्यक्तिको अधिकार र पहुँच सुनिश्चित गर्ने कार्यक्रमलाई पनि प्राथमिकता दिइनेछ ।
जनताका मुख्य अपेक्षा के–के छन् ?
जनताको अपेक्षा असीमित छन् । स्वास्थ्य, शिक्षा र रोजगारी उनीहरूको प्रमुख आवश्यकता हो । रोजगारीका लागि ठूलो संख्यामा युवा विदेशिनुपर्ने अवस्था अन्त्य गर्न स्थानीयस्तरमै अवसर सिर्जना गर्नुपर्छ ।
व्यावसायिक कृषि र पर्यटनमार्फत युवालाई आफ्नै ठाउँमा स्वरोजगार बनाउनेतर्फ हाम्रो प्रयास केन्द्रित हुनेछ। विदेशबाट फर्किएका युवालाई समेत स्थानीय उत्पादन र व्यवसायमा जोड्ने योजना छ ।
प्रदेश र स्थानीय सरकारबीचको समन्वय कस्तो छ ?
स्थानीय र प्रदेश सरकार एकअर्काका परिपूरक हुन् । ठूला पूर्वाधार तथा गौरवका योजनामा प्रदेश सरकारसँग समन्वय आवश्यक हुन्छ । शीतगंगा क्षेत्रमा प्रदेश सरकारको सहयोगमा धनखोला–पाखुरी हर्रेचाक्ला मोटरबाटो, लाहापे–सिलिङखोला–चिदिचौर, बोखर–सिद्धारा, लौरी–लामाताल, डमारबेँसी–कानाचौर, अमराई–जुकेना–पतञ्जलीलगायत सडक तथा अन्य गौरवका योजनाहरू अघि बढेका छन् ।
यी योजनाले स्थानीय बासिन्दालाई सरकारसँग प्रत्यक्ष जोड्न महत्वपूर्ण भूमिका खेलेका छन् ।
अन्त्यमा वडावासी जनतालाई के भन्न चाहनुहुन्छ ?
म आफ्नो कार्यकालको आफैं मूल्यांकन गर्न चाहन्नँ । यसको मूल्यांकन वडाका जनताले गर्ने हो । करिब नौ वर्षको अवधिमा धेरै काम भएका छन् र अझै धेरै सम्भावना बाँकी छन् ।
हामीले वडाको समग्र विकासलाई केन्द्रमा राखेर काम गरिरहेका छौं । धार्मिक, पर्यटन र खेलकुदको विकाससँगै आर्थिक समृद्धिलाई जोड्ने योजना छ । आगामी दिनमा यसको परिणाम देखिने गरी काम गर्नेछौं ।
भाषणभन्दा काममा विश्वास गर्छु । वडावासीको सुझाव र सल्लाहअनुसार अघि बढ्दै शीतगंगा–९ लाई नमूना वडा बनाउने लक्ष्यका साथ निरन्तर काम गर्ने प्रतिबद्धता व्यक्त गर्दछु ।