गुल्मी । शुक्रवार बुटवलबाट काठमाण्डौं जाने क्रममा धादिङको झ्याप्लेखोलमा माईक्रोबस पहिरोले पुरिदा मृत्यु भएका १४ जना मध्ये ६ जना गुल्मीका परेका छन् । बुटवलबाट हिँडेको लु १ ज ४५ ७८ नम्बरको माईक्रोबस पहिरोले पुरिदा गुल्मीको मदाने गाउँपालिकाका ६ पुर्कोटदहका ३ जना र गुल्मी दरबार गाउँपालिका ७ , साबिक दरबार देविस्थान २ लामडाँडाका पनि एकै परिवारका ३ जना सहित ६ जनाको मृत्यु भएका हो ।
जिल्ला प्रहरी कार्यालय गुल्मीका प्रवक्ता डिएसपी शंंकर पोखरेलका अनुसार पुर्कोटदका ३४ वर्षीय प्रकाश कुँवर, उमेर उमेर नखुलेकी उनकी नव विवाहित श्रीमती अनु कुँवर र बहिनी सिर्जना कुँवर सहित एकै परिवारका तिन जनाको मृत्यु भएको हो ।
डिएसपी पोखरेलका अनुसार कोरियाको रोजगारबाट फर्किएका उनको एक महिना अघि मात्र विवाह भएको थियो । काठमाण्डौमा रहेका मृतका दाजु सुरेन्द्र कुँवरले यी जोडीको साउन २७ गते विवाह भएको बताए । विवाह भई पुर्कोटदहमा विवाह दर्ता गराएर बुटवल हुँदै काठमाडौँ जाने क्रममा यस्तो दुखद घटना घटन पुगेको हो ।
त्यस्तै गुल्मी दरबार ७ लामडाँडाका पनि एकै परिवारका तिन जनाको ज्यान गएको त्यस वडाका वडाध्यक्ष सालिकराम टण्डनले जानकारी दिए । उनका अनुसार त्यस गाउँका ६३ वर्षीय जुद्धबहादुर रायमाझी, उनकी बुहारी ३१ वर्षीय प्रतिमा भुसाल रायमाझी र उनका ३ वर्षीय छोरा पिसव रायमाझीको मृत्यु भएको हो ।
रायमाझी परिबार सुरुमा बुटवल बस्ने गरेको र हाल काठमाण्डौको कीर्तिपुरमा बसोबास गर्ने गरेको वडाध्यक्ष टण्डन बताउँछन् । पुर्कोटदहका कुँवर परिबार पनि बुटवल र काठमाडौँ बसोबास गर्ने गरेको स्थानीय बताउँ छन् । उनिहरुको शव काठमाडौँ टिचिङको टिचिङ अस्पतालका रहेको डिएसपी पोखरेलले बताए ।
