पर्यटकीयस्थल लुम्बिनीको प्रवेशद्वार भैरहवामा ट्राफिक व्यवस्थापन चुस्त हुन सकेको छैन । स्थलमार्गबाट धेरै पर्यटक आउने बेलहिया नाका पनि यही पर्ने भएकाले पर्यटकमैत्री पूर्वाधार र व्यवस्थापनमा ध्यान नपुग्नु सरकारी निकायको गैरजिम्मेवारी हो ।
पर्यटकीय क्षेत्रमा पर्यटकमैत्री वातावरणले नै पर्यटक आगमन बढ्ने हो । उनीहरुले फर्कदा सकारात्मक सन्देश लिएर जान सक्छन् । बेलहिया नाकाबाट छिर्नेबित्तिकै गाडीको जाम, मनपरी पार्किङ र बर्खामा हिलाम्मे र हिउँदमा धुलाम्मे सडकले उनीहरुले लिएर जाने सन्देश कस्तो होला ? भैरहवामा बसपार्क छ, तर बसपार्कमै बस पार्किङ्लाई कडाइ गर्न प्रहरीले सकेको छैन । ट्रकहरुको पार्किङ् सडक किनारमै भइरहेको छ । साना गाडीको पार्किङ् पनि सडकमै हुन्छ । व्यवसायीले व्यापार गर्न पसल खोलेका छन्, तर उनीहरुका गाडी पसल अगाडि पार्किङ् भइरहेका छन् । पार्किङ अस्तव्यस्त हुँदा शहरको सौन्दर्य नै हराएको छ । फराकिला सडक त बनेका छन्, तर ती सडक गाडी पार्किङ् गर्ने थलो बन्नु  भैरहवाको दुर्भाग्य हो ।

गौतमबुद्ध अन्तर्राष्ट्रिय विमानस्थलबाट हवाइ उडान बढाउन पहल भइरहेको छ । आन्तरिक उडान हुँदै आइरहेको यो विमानस्थलबाट अब केही समयभित्रै अन्तर्राष्ट्रिय उडान हुँदैछ । अन्तर्राष्ट्रिय उडान भएसँगै यहाँ आवागमन अझैँ बढ्दै जानेछ । अब ट्राफिक व्यवस्थापन गर्न स्पष्ट कार्ययोजना बनाएर अघि बढ्नुपर्छ । तत्काल र दीर्घकालसम्म गर्नुपर्ने कामका बारेमा सिद्धार्थनगर नगरपालिकाले प्रष्ट धारणा अघि सार्नुपर्छ । ट्राफिक प्रहरीले पनि भैरहवाको ट्राफिक व्यवस्थापन के गर्दा चुस्त बनाउन सकिन्छ भन्ने बारेमा स्थानीय तहसँगको साझेदारीमा अघि बढ्नु उत्तम हुन्छ ।

शहरमा फराकिला सडक बनाएर मात्रै हुँदैन्, ती सडक पार्किङ्का लागि प्रयोग भए भने त्यसको महत्व र उपयोगिता हुँदैन । फराकिला सडकमा गाडी कुद्न पाए मात्रै शहरमा आवागमन सहज हुन्छ । अहिले भइरहेको भद्रगोललाई थप नबढाउनका लागि अहिले नै पहल थाल्नु परिपक्क काम हुन्छ ।