लुम्बिनी प्रादेशिक अस्पतालको निर्माणाधीन १२ तले भवन निर्माणको अवस्थाबारे सरोकारवाला निकायबिच छलफल भएको छ । विकास आयोजनालाई तोकिएको समयमा गुणस्तरीय ढंगले सम्पन्न गर्न स्थानीयस्तरमा हुने सहयोगले महत्वपूर्ण अर्थ राख्छ । स्थानीयस्तरमा रहेका संघ–संस्था, राजनैतिक दललगायतले अपनत्व गर्दा नै विकास आयोजना सफल हुने हो ।

मुलुकमा संघीय शासन प्रणाली स्थापनापछि तहगत सरकारबिच समन्वय र सहकार्यलाई जोड दिइएको छ । संविधानको मर्म तहगत सरकारबिच समन्वय र सहकार्य गर भन्ने भएकाले पनि तहगत सरकारबिच समन्वय अपरिहार्य छ । यद्यपी अहिले तहगत सरकारबिच समन्वयको अभाव छ । यही समन्वयको अभावले प्रदेश र संघीय सरकारले सञ्चालन गरेका आयोजनाप्रति स्थानीय तहले अपनत्व नलिने प्रवृत्ति छ । पालिकामा कार्यान्वयन हुन लागेको र स्थानीय समुदाय लाभान्वित हुने आयोजनाप्रति अपनत्व लिन नखोज्नुको कारण हो, समन्वयको अभाव । स्थानीय तहले कतिपय महत्वपूर्ण ठानेका आयोजना सिफारिश गरेर पठाए पनि संघीय र प्रदेश सरकारले बेवास्ता गर्ने प्रवृत्ति पनि कतिपय अवस्थामा देखिन्छ । यही अवस्थाको अन्त्य गर्न हुनसक्छ, यहाँ निर्माणाधीन अस्पताल निर्माणको अवस्थाबारे जानकारी दिन र सुझाव ग्रहण गर्न छलफल भयो । प्रदेश पूर्वाधार प्राधिकरणको अगुवाइमा भएको छलफलले यो आयोजनाप्रति अपनत्व बढेको छ । आयोजना निर्माणका क्रममा कुनै समस्या आए समाधानको सहज वातावरण तयार भएको छ ।

प्रदेश पूर्वाधार प्राधिकरणले ६ अर्ब १८ करोड ७५ लाख रुपैयाँको लागतमा ठेक्का सम्झौता गरी काम अघि बढेको छ । अस्पतालको निर्माणाधीन भवनको एक महिनाअघि अर्थमन्त्री विष्णु पौडेलले शिलान्यास गरिसकेका छन् । २०८५  पुषसम्म काम सक्ने सम्झौता भए पनि निर्माण कम्पनी र पूर्वाधार प्राधिकरणले तीन वर्षभित्रै अस्पताल भवन निर्माणको काम सक्ने प्रतिबद्धता व्यक्त गरेकाले पनि निर्माणका क्रममा कुनै समस्या आए सहज समाधानको बाटो खोज्नुपर्नेछ । यो आयोजना तीन वर्षभित्रै सम्पन्न भयो भने विकास आयोजनाप्रति सकारात्मक सन्देश प्रवाह हुनेछ । अहिलेसम्म विकास आयोजना बेलैमा सम्पन्न नहुने प्रवृत्तिले नागरिकमा निराशा छ । विकास आयोजना बेलैमा सम्पन्न नहुँदा त्यसले दिने सास्तीले नागरिक आजित छन् । धुलो, धुवाँलगायत प्रदुषणको मार व्यहोरेका नागरिकले बरु आयोजना नभइदिएको भए हुन्थ्यो भन्ने धारणा राख्दा विकास आयोजनाप्रति नकारात्मक मनोविज्ञान तयार भएको छ ।

लुम्बिनी प्रदेशको गौरवको आयोजना लुम्बिनी प्रादेशिक अस्पतालको पूर्वाधार विकास गरी विशिष्टिकृत सेवा उपलब्ध गराउन सक्दा बुटवलको स्वास्थ्य सेवाले छलाङ मार्ने छ । योसँगै यहाँको बजार पनि चलायमान हुन बल पुग्छ । बुटवलवासीले यो अस्पतालको स्तरवृद्धिका लागि हुने हरेक कामप्रति अपनत्व लिएर अघि बढ्नु नै उत्तम हुन्छ ।