बुटवल । बुटवलको लुम्बिनी केबलकार दशैंको टिकाको दिन पनि खुल्ने भएको छ । हिन्दु नेपालीहरुको प्रमुख चाड बडा दशैंमा केबलकार यात्रा र कामाख्या देवी मन्दिर दर्शन गर्न चाहने भक्तजन र पर्यटकको सुविधालाई मध्यनजर गरी दशैंको टिकाको दिन समेत केबलकार सञ्चालनमा रहने कम्पनीले जनाएको छ ।
‘दशैंको टिकाको दिन सहित दशैं विदा भरि सबै दिन केबलकार सञ्चालन हुन्छ’–केबलकारका अप्रेसन म्यानेजर डिएन कायस्थ सैंजूले भने ।
बडा दशैंको नवरात्रका अवसरमा बसन्तपुरमा प्रख्यात शक्तिपीठ कामाख्यादेवी मन्दिर र सय वर्षदेखि पुजा हुंदै आएको दुर्गा माताको मन्दिरमा समेत भक्तजनको आकर्षण रहेको लुम्बिनी केबलकार लि. ले जनाएको छ ।
चाडपर्वमा लुम्बिनी केबलकारको रोमाञ्चक यात्रा मार्फत ऐतिहासिक एवं धार्मिक स्थल बसन्तपुरमा पुगेर स्वच्छ, शान्त र रमणीय वातावरणमा घुमफिर गरी दशैं विदाको आनन्द लिन सबैमा कम्पनीले आग्रह गरेको छ ।
