पाल्पा । नेपाल रेडक्रस सोसाईटी पाल्पाले तानसेनमा छिट्टै ब्लड बैक संचालनको तयारीमा जुटेको छ । रेडक्रस पाल्पाले छिटो भन्दा छिटो ब्लड बैक संचालनको लागी आफ्नै कार्यालयमा ल्याव निर्माण गरिसकेको छ भने आवश्यक उपकरण खरिदको लागी पक्रिया अगााडी बढाएको छ । व्लड बैकको स्थायी भवन निर्माणको लागी शहरी विकास मन्त्रालय बाट १ करोड ५३ लाख र स्वास्थ्य मन्त्रालय बाट उपकरण खरिदको लागी ५० लाख रुपैया बजेट विनियोजन भएको छ ।
पाल्पामा ४ वटा ठूला अस्पतालमा सधैंं रगतको अभावले बिरामीलाई परेको समस्या समाधानका लागी बर्तमान कार्यसमिती सक्रिय भएर लागिरहेको छ । पाल्पामा हाल वार्षिक ४ हजार युनिट रगतको आवश्यकता पर्ने भएकोले कार्यसमिति ‘हाम्रो ब्लड बैंक हामी बनाउँछौं’ अभियानमा लागेको रेडक्रस पाल्पाका सभापती बाबुराम कार्कीले बताए ।
सहयोग रकम जुटाउन रेडक्रस पाल्पाले यशस्कर र बिशिष्ट सदस्यता वितरण गर्दै आएको छ । हालसम्म यशस्कर सदस्यबाट ६ लाख रुपैया र विशिष्ट सदस्यहरु बाट २२ लाख रुपैया, स्मृतिकोष बाट ७ लाख रुपैया, विभिन्न संघ संस्था बाट ६ लाख ८० हजार रुपैया, देशबाहिर काम गर्न गएका विभिन्न व्यक्तिहरुको संघ संस्था बाट ३ लाख ९५ हजार गरी ४४ लाख ७५ हजार रुपैया नगद संकलन भएको सभापती कार्कीले जानकारी दिए ।
ब्लड बैक संचालनको लागी ५ करोड ७५ लाख रुपैया बजेट आवश्यक भएकोमा भवन निर्माण तथा सामाग्री खरिदको लागी २ करोड ३ लाख रुपैया सरकारी स्तर बाट र विभिन्न सहयोग बाट ४४ लाख ७५ हजार नगद मात्र संकलन भएको रेडक्रस पाल्पाले जनाएको छ ।
सरकारी तथा गैरसरकारी तवर बाट गरी २ करोड ४७ लाख ७५ हजारको मात्र श्रोत सुनिश्चित भएकोमा अझै आधा भन्दा धेरै रकम संकलन गर्नुपर्ने भएकोले सबैपक्ष बाट ब्लड बैक संचालनको लागी सक्दो सहयोग गरिदिन रेडक्रस पाल्पाले अनुरोध गरेको छ । संस्थाले ३ करोड रुपैया मुद्दती गरेर कर्मचारी र प्रशासनीक खर्च संचालन गर्ने योजना बनाएको छ ।
भवन निर्माणको लागी पाल्पा लायन्स क्लव अफ पाल्पाले भुसालडाडा क्षेत्रमा निशुल्क जग्गा प्रदान गरेको छ । पाल्पाका ८ गाउँपालिकाले ५ लाखका दरले ४० लाख रुपैया, २ वटा नगरपालिकाले १० लाख रुपैयाका दरले २० लाख रुपैया अनुदान सहयोग गर्ने प्रतिवद्धता जनाएको रेडक्रस पाल्पाका पुर्व सभापती बुद्धि प्रसाद शर्माले बताए । ब्लड बैक लाई सहयोग गर्नु भनेको हरेक व्यक्तिको जिवन बचाउन गरिएको महापुन्य कार्य भएकोले सबैपक्ष लाई सहयोगमा जोडिन पुर्व सभापती शर्माले अनुरोध गरे ।
कार्यक्रममा पत्रकारहरुले रेडक्रसले संचालन गरेको महाअभियान निकै राम्रो भएकोले यसलाई सफल बनाउन पत्रकारहरुको पनि भुमिका रहेको बताए । पत्रकारहरुले उठाएका विभिन्न जिज्ञासाहरुको सभापती कार्की, पुर्व सभापती शर्मा र उपाध्यक्ष भिमसेन कार्कीले जवाफ दिएका थिए । आगामी ३ महिना भित्र ब्लड बैक संचालन गर्ने तयारीका काम भईरहेको रेडक्रस पाल्पाले जनाएको छ ।
