भैरहवा । सिद्धार्थ उद्योग बाणिज्य संघ, रुपन्देहीको आयोजनामा आउँदो मंसिर २० गतेदेखि भैरहवामा ‘नवौं लुम्बिनी राष्ट्रिय महोत्सव-२०८१’ हुने भएको छ । ‘पर्यटन, उद्योग, कृषि र व्यापार, राष्ट्रिय समृद्धिको आधार’ भन्ने मूल नाराका साथ पुस १ गतेसम्म संचालन हुने उक्त महोत्सवमा विभिन्न सेवा तथा बस्तुका ३ सय वटा स्टल रहने आयोजकले आइतबार भैरहवामा पत्रकार सम्मेलन गरी जानकारी गराए । ३ सय स्टल मध्ये संघमा आवद्ध सदस्य व्यवसायीलाई १० वटा स्टल निशुल्क दिइने संघले जनाएको छ ।
महोत्सवले भैरहवा क्षेत्रको आर्थिक चलायमान बनाउन महत्वपूणर् टेवा पुग्नेसंघका अध्यक्ष तथा महोत्सव मूल आयोजक समितिका संयोजक ठाकुरकुमार श्रेष्ठले बताए । आर्थिक मन्दीको असर कायमै रहेका बेला मेला-महोत्सवको अनुकुल नभएको भए पनि स्थानीय व्यवसाय प्रबद्र्धनका लागि महोत्सवको आयोजना गरिएको श्रेष्ठले बताए ।
महोत्सव नाफा कमाउने उद्देश्यले आयोजना गरेकोनभई स्थानीय व्यवसायको प्रबद्र्धन गर्नका लागि निरन्तरता दिएको उनको भनाई छ । महोत्सव अवधिमा स्थानीय उत्पादन तथा व्यवसाय प्रबद्र्धन गर्नका लागि विभिन्न बिषयगत बिज्ञसहितको अन्तरक्रिया तथा छलफल कार्यक्रम गरेर महोत्सवलाई सार्थक बनाइने दावी उनले गरे ।
महोत्सवले स्वदेशी उत्पादन तथा गुणस्तरीय बस्तु तथा सेवाहरुको उपभोगप्रति उपभोक्ताहरुलाई जागरुक बनाई सीमावर्ती बजारहरुमा पाइने सामानहरुबीचको तुलनात्मक मूल्यका वारेमा जानकारी दिने र स्थानीय स्तरमा उत्पादित घरेलु तथा हस्तकलाका सामग्रीको बजार प्रबद्र्धन गर्ने बिश्वास लिइएको उनले जनाए ।
रुपन्देहीलाई पर्यटकीय, औद्योगिक तथा व्यापारिक केन्द्रको रुपमा बिस्तार गर्न, यस क्षेत्रको विभिन्न जाती तथा समुदायको कला संस्कृतिको संरक्षण गर्दै बिशेष गरि सिद्धार्थनगर र लुम्बिनीमा देशको आन्तरिक र बाह्य पर्यटन प्रबद्र्धन गर्ने, विभिन्न जिल्लाका मौलिक तथा बिशिष्टता पहिचान भएको बस्तु तथा उत्पादनको प्रदर्शनी तथा प्रबद्र्धन गर्ने मुख्य उद्देश्य महोत्सवको रहेको संघका वरिष्ठ उपाध्यक्ष नेत्रप्रसाद आचार्यले बताए ।
महोत्सवलाई सफल र सार्थक बनाउन आयोजक सिद्धार्थ उद्योग बाणिज्य संघको मात्र नभएर भैरहवाका स्थानीयबासीको महत्वपूणर् भूमिका रहने आचार्यले अपेक्षा गरे । महोत्सवको अवलोकन गर्नका लागि उत्साहित बनाउने बतावरण तयार गरि महोत्सवमा भएका गतिविधिलाई उजागर गरिदिन उनले संचारकर्मीहरुलाई आग्रह गरे ।
लुम्बिनी प्रेस क्लवका अध्यक्ष कमल रायमाझीले सिद्धार्थ उद्योग वाणिज्य संघले महोत्सवलाई निरन्तरता दिन सक्नु ठूलो कुरो भएको र दैनिक हजारौंको संख्यामा सामान किनमेलका लागि सीमावर्ती भारतीय बजार पुग्ने गरेका नेपाली उपभोक्ताको प्रबृत्ति चुनौतीपूणर् बन्दै गएकाले यसतर्फ बिशेष पहल गर्नु पर्ने बताए ।
जिल्लामा सरुवा भई आउने सुरक्षा प्रमुख लगायतका अन्य कर्मचारीलाई सर्वेसर्वा मानेर आवश्यकता भन्दा धेरै महत्व दिने गर्नाले सीमावर्ती जिल्लाहरुमा व्यापक रुपमा चोरी तस्करी बढ्ने गरेको उनले बताए ।
महोत्सव अवधिमा बुद्ध जन्मस्थल लुम्बिनी र बुद्धसँग सम्बन्धित रहेका तिलौराकोट, देवदह, रामग्राम जस्ता पुरातात्विक तथा पर्यटकीय स्थलहरुमा बिशेष प्याकेज बनाइ भ्रमणको व्यवस्था गराइएको महासचिव कृष्णप्रसाद घिमिरेले जानकारी दिए ।
कृषि, पर्यटन, अटो मोबाइल्स, आईटी, घरेलु उत्पादन आदिका मर्चवारदेखि मुस्ताङसम्मका उत्पादन राखिने महोत्सवमा करिब १० करोड रुपैयाँ बराबरको कारोबार हुने अपेक्षा संघको रहेको सचिव मंगल भण्डारीले बताए ।
संघले २०६१ सालदेखि भैरहवामा मेला महोत्सव आयोजना गर्न सुरु गरेको हो । महोत्सवमा राष्ट्रिय तथा स्थानीय कलाकारको दैनिक प्रस्तुती रहने र सिमावर्ती भारतीय शहरबाट पनि सहभागिता रहने भएकाले पर्यटन प्रबद्र्धन तथा आर्थिक गतिबिधि चलायमान हुने बिश्वास लिइएको छ ।
