गौतमबुद्ध अन्तर्राष्ट्रिय विमानस्थलमा लामो समय अन्तर्राष्ट्रिय उडान नहुँदा निराश व्यवसायीमा अहिले उत्साह छ । पाँच वटा विमान कम्पनीले उडान सुरु भएको उत्साह लामो समयसम्म रहन्छ कि रहँदैन भन्ने आशंका कायमै छ । जबर्जस्ती विमान कम्पनी भैरहवा त आए, तर विमानस्थल सञ्चालनका लागि आउनुपर्ने विभिन्न सरकारी कार्यालय आउन नसक्दा आशंका हुुनु स्वाभाविकै हो ।
विमानस्थल चल्नका लागि यहाँ तत्काल श्रम स्वीकृतिको लागि कार्यालय आवश्यक पर्छ । मेडिकल जाँच, भिसा सेन्टर, कार्गो र विदेश पढ्न जाने विद्यार्थीको लागि नो अब्जेक्सन सर्टिफिकेट(एनओसी), ठूला ट्राभल एजेन्सीका कार्यालय स्थापना पनि हुनुपर्छ । ती कार्यालय नहुँदा सेवाग्राही काठमाडौं धाउनुपर्ने बाध्यता छ । विमानस्थलमा विमान आए, तर विमानस्थल चल्नका लागि चाहिने कार्यालय स्थापनामा ढिलाइ हुनु गैरजिम्मेवार क्रियाकलाप हो । मुलुकमा संघीय शासन प्रणाली स्थापना भइसकेको छ, तर केन्द्रीकृत राज्य संरचनाको मनोविज्ञान बदलिन नसक्दा शासन प्रणाली संस्थागत हुन सकेको छैन । राजनैतिक नेतृत्व मात्रै विकेन्द्रित भएर हुँदैन । त्यसअनुसार प्रशासनिक संरचना पनि विकेन्द्रित हुनुपर्छ । मुलतः हाम्रो सोंच, विचार र धारणा पनि प्रणाली अनुसार बदलिनुपर्छ ।
अहिले भैरहवाका लागि कतार एयरवेज र फ्लाई दुबईले दैनिक एक, नेपाल वायुसेवा निगमनले सातामा पाँच, जजीरा एयरवेजले सातामा तीन र थाई एयर एसियाले सातामा दुई उडान गरी सातामा २४ उडान गरिरहेका छन् । थाई एयर एसिया र जजीराले आफ्नो मुलुकबाट भैरहवा सिधा उडान गरेका छन् । सरकारी कार्यालयको स्थापनासँगै भैरहवा विमानस्थल प्रयोगकर्ता बढ्न सक्छन् ।
अब गर्नुपर्ने पहिलो काम आवश्यक सरकारी कार्यालयको स्थापना छिटो गर्नु हो । दोस्रो काम भनेको देशका विभिन्न ठाउँबाट भैरहवा उडानको व्यवस्था हुनुपर्छ जसले आन्तरिक हवाई सञ्जालबाट पनि भैरहवा जोडिन सकोस् । तेस्रो भनेको गौतमबुद्ध विमानस्थलमा बौद्धमार्गी पर्यटक ल्याउन ती देशबाट सिधा उडानको पहल हुनुपर्छ । प्रधानमन्त्रीको आगामी चीन भ्रमणमा पनि सिधा उडान बारे छलफल हुन सक्यो भने चीनका केही शहरबाट सिधा उडान हुन सक्दा चिनियाँ पर्यटक लुम्बिनी आउने बाटो खुल्छ ।
सरकारले निर्णय गर्ने, तर कार्यान्वयन नहुने प्रवृत्ति कायमै छ । भैरहवामा आवश्यक विभिन्न कार्यालय छिटो स्थापना गर्ने निर्णय भए पनि कार्यान्वयनमा ढिलाइ भएको छ । विभिन्न मुलुकसँग हवाई सम्झौता गर्ने भनिए पनि पहलकदमी हुन सकिरहेको छैन् । भारतसँग पश्चिमतर्फको हवाई रुट पाउनका लागि कुटनीतिक पहल निष्कर्षमा पुग्न नसक्दा पनि समस्या भएको छ । विमानस्थल चलाउनका लागि निरन्तर मिहिनेत आवश्यक छ । त्यसका लागि कर्मचारी संयन्त्रमा मौलाएको केन्द्रीकृत मानसिकता र व्यवसायीको सिण्डिकेट तोड्दै अघि बढेर व्यवसायीमा विश्वास दिलाउनुपर्नेछ ।
