बुटवल ।
न्यु होराइजन मावि बुटवलको आयोजनामा आजदेखि ३१औं संस्करणको प्रदेश स्तरीय हाजिरीजवाफ प्रतियोगिता सुरु भएको छ ।
प्रतियोगिताको शुक्रबार एक कार्यक्रमकाबीच बुटवल उपमहानगरपालिकाका प्रमुख खेलराज पाण्डेयले उद्घाटन गरेका हुन् ।
कार्यक्रममा नगर प्रमुख खेलराज पाण्डेयले सिपसहितको नैतिक शिक्षा बुटवलको एजेन्डा भएको भन्दै सोहि अनुसार बुटवल उपमहानगरपालिकाले बजेट छुट्याएको बताए ।
शिक्षामा सबैभन्दा धेरै बजेट छुट्याउने पालिका बुटवल रहेको भन्दै उनले चालु आर्थिक बर्षमा शिक्षाका लागि बुटवलले २६ प्रतिशत वजेट छुट्याएको जानकारी गराए ।
शिक्षासँगै बुटवल उपमहानगरपालिका देशकै सबैभन्दा धेरै खेलकुद प्रतियोगिता आयोजना गर्ने पालिका भएको दाबी गर्दै नगर प्रमुख पाण्डेयले सरकारी र निजी विद्यालयहरूबीच समन्वय र सहकार्य गरेर अगाडि बढ्ने पालिका पनि बुटवल भएको उल्लेख गरे ।
उच्च शिक्षा हाशील गरेका विद्यार्थीहरूले सामान्य निवेदन समेत लेख्न नजान्ने अवस्था रहेको भन्दै उनले सीप सहितको शिक्षा, मौलिक संस्कृतिसहितको नैतिक शिक्षा आजको आवश्यकता भएको बताए ।
शिक्षा र स्वास्थ्यको क्षेत्रमा भएको प्रगतिकै कारण बुटवलको छुट्टै पहिचान स्थापित भएको भन्दै उनले बुटवललाई शिक्षा र स्वास्थ्यको हबको रूपमा विकास गर्ने योजना रहेको बताए ।
बुटवल कालिका क्याम्पसका क्याम्पस प्रमुख घनश्याम पाठकले सामुहिक प्रयासकै कारण बुटवलका सामुदायिक विद्यालयहरूले उत्कृष्ट नतिजा दिन सफल भएको भन्दै २१ औं सताब्दीका शिक्षण संस्थाहरू समय र परिस्थिति अनुसार रूपान्तरण हुन जरुरी रहेको बताए ।
बिगतमा विद्यालय पढ्ने पढाउने थलोका रूपमा रहेको भन्दै उनले विद्यालयहरू पढ्ने पढाउने मात्रै नभएर अब सिक्ने र सिकाउने थलोको रूपमा रूपान्तरण हुनुपर्नेमा जोड दिए ।
न्यु होराइजनका प्रिन्सिपल लोकनाथ उपाध्यायले मुलुकको शैक्षिक विकासमा निजी शिक्षण संस्थाहरूको महत्त्वपूर्ण योगदान रहे पनि राज्यले
निजी शिक्षण संस्थालाई भेदभाव र सौतेलो व्यवहार गरेको गुनासो गरे ।
विद्यालय ब्यवस्थापन समिति अध्यक्ष ज्ञानेन्द्र कसजुले नाफा कमाउनका लागि शिक्षामा लगानी गरेको नभएर अध्ययनका लागि यस क्षेत्रका विद्यार्थीहरू अन्यत्र जान नपरोस भन्ने उद्दश्यले आफुहरूले निजी शिक्षण संस्थामा लगानी गरेको बताए ।
कार्यक्रममा अभिभावक संघ रूपन्देहीका अध्यक्ष लोकनाथ ज्ञवाली,कार्यक्रम संयोजक मुक्तिनाथ पौडेल, विद्यालयकी शिक्षिका कल्पना कुसुम लगायतले आ आफ्नो भनाइ राखेका थिए ।
प्रतियोगितामा रुपन्देही, कपिलवस्तु र नवलपरासीका ७५ विद्यालयहरूको सहभागीता रहेको छ । प्रत्येक केन्द्रमा हिट राउण्डबाट ६ वटा विद्यालय सेमी फाइलनमा प्रवेश गरेका छन् । सेमी फाइलनलमा प्रत्येक केन्द्रमा प्रथम पुरस्कार ९ हजार, द्वितीय पुरस्कार ६ हजार, तृतीय पुरस्कार ४ हजार पांच सय र सिल्ड, ट्रफी र प्रमाण पत्र प्रदान गरिने छ । न्यू होराइजन मावि बुटवल देवीनगरमा हुने फाइनलमा प्रत्येक केन्द्रबाट सेमी फाइनलमा प्रथम र द्वितीय गरी ६ विद्यालयले उपाधिका लागि प्रतिस्पर्धा गर्ने छन् । प्रतियोगितामा प्रथम हुने विद्यालयले प्रथम पुरस्कार ४० हजार, द्वितीय हुनेले २५ हजार र तृतीय हुनेले २० हजार नगद तथा सिल्ड, ट्रफी र प्रमाण पत्र पाउने विद्यालयका प्राचार्य उपाध्यायले जानकारी दिए ।
प्रदेश स्तरीय हाजिरीजवाफ प्रतियोगिता अन्तर्गत बुटवलसंगै दाङको लमही र पाल्पाको तानसेनमा पनि पहिलो चरणको छनोट प्रतियोगिता भएको कार्यक्रम संयोजक मुक्तिनाथ पौडेलले जानकारी दिए ।
