बुटवल उप–महानगरपालिकाले  मुख्य चोक र बजार क्षेत्रमा सीसी क्यामेरा जडान गरेर नगरलाई प्रविधियुक्त बनाउनु सकारात्मक छ । सीसी क्यामेराको प्रयोगले अपराधिक गतिविधि न्यूनीकरणमा सघाउ पुग्ने र न्यून मानवीय जनशक्तिले पनि काम चलाउन सकिने भएकाले अहिले सीसी क्यामेरा प्रभावकारी मानिन्छ ।

बुटवल दुई राजमार्गको मिलनविन्दु हो । पूर्व पश्चिम महेन्द्र राजमार्ग र सुनौली–पोखरा सिद्धार्थ राजमार्गको मिलनविन्दु भएकाले जताततैका मान्छेहरुको आवागमन भइरहने थलो हो । यो तराई र पहाडको प्रवेशद्वार पनि हो । भारतीय सीमाको समेत नजिक पर्ने बुटवल मुलुकको महत्वपूर्ण व्यापारिक शहर मात्रै नभएर रणनीतिक महत्वको ठाउँ पनि हो । अत्याधिक मान्छेको आवतजावत हुने ठाउँमा सुरक्षा सतर्कतामा ध्यान नदिने हो भने कुनै अपराध भइसकेपछि अभियुक्त फेला पार्न समस्या हुन्छ । बढ्दो सवारी चापले दुर्घटनाको जोखिम बढिरहेकाले दुर्घटना भइसकेपछि घटनामा संलग्न सवारी र चालक फेला नपर्ने जोखिम उत्तिकै हुन्छ । सीसी क्यामराको सहायताले मान्छेको निगरानी गर्न सकिने र दुर्घटनाको अवस्था बारे पनि हेर्न सकिन्छ । केही महिनाअघि कोहलपुरमा एउटा लुटपाटको घटनाको अनुसन्धान गर्दा प्रहरीले सीसी क्यामराको सहायता लिएको थियो । सीसी क्यामरामा देखिएका व्यक्तिलाई शंकास्पद मान्दै खोजी गरी अनुसन्धान गरेको थियो । अन्ततः अनुसन्धानबाट तिनै शंकास्पद मानिएका व्यक्ति घटनाका अभियुक्त भएको पुष्टि भयो । बुटवलमा पनि अपराध अनुसन्धानमा सीसी क्यामरा प्रभावकारी हुनसक्छ ।  वडा नम्बर ४, ५, ७ र ८ का मुख्य स्थानहरुमा १ सय २५ वटा सीसी क्यामेरा जडान भएकाले पक्कै पनि नगरको शान्ति सुरक्षा सबल बनाउन सघाउ पुग्नेछ । 

सीसी क्यामेरा जडानले मात्रै समस्याको समाधान गर्दैन । सीसी क्यामराको रेखदेख पनि  आवश्यक छ । सीसी क्यामेरालाई अपराधिक स्वभावका व्यक्तिले नष्ट गर्न सक्छन् । उप–महानगरपालिकाले जडान गरेको क्यामरा जोगाउन समुदायको पहलकदमी आवश्यक छ । पहिले यहाँका विभिन्न व्यवसायिक संघसंस्था मिलेर सीसी क्यामेरा जडान गरेका थिए । ती क्यामरा लामो समय टिक्न सकेनन् । मर्मतसंभारको अभावमा केही वर्षमै ती क्यामराले काम गरेनन् । उप–महानगरपालिकाले अहिले जडान गरेका क्यामराको नियमित मर्ममलाई ध्यान दिनुपर्छ । त्यसो भयो भने जुन प्रयोजनले क्यामरा जडान भयो, त्यसको नतिजा देखिन्छ ।

आगामी वर्षहरुमा पनि सीसी क्यामेरा जडानलाई निरन्तर राख्नुपर्छ । नगरको हरेक टोलमा अनिवार्य सीसी क्यामरा राख्ने प्रबन्ध मिलाउनुपर्छ । प्रविधियुक्त नगर बनाउँदा नागरिकको मनोबल बढ्छ । शान्ति सुरक्षाको वातावरण बन्छ । प्रहरी र स्थानीय सरकारबिचको सहकार्यको वातावरण बन्छ । अन्ततः स्थानीय सरकारप्रति नागरिकको भरोसा र विश्वास बढ्छ ।