पाल्पाको रिब्दीकोट र रैनादेवी छहरा गाउँपालिकाको संयुक्त आयोजनामा मंसिर २२ र २३ गते सुन्तला महोत्सव हुने भएको छ । पाल्पाको रैनादेवी छहरा–५, मुझुङ कटौजेपानीमा हुन लागेको सुन्तला महोत्सव यो दोस्रो हो । गत वर्षदेखि यहाँ सुन्तला महोत्सव हुन लागेको हो ।
शहर बजारमा विभिन्न मेला महोत्सव चलिरहेको बेला गाउँमा भिन्दै खालको महोत्सव हुन लागेको छ । गाउँको कृषि उत्पादनलाई बजारीकरण गर्न यो महोत्सव उपयोगी हुने विश्वास गरिएको छ । पाल्पाका विभिन्न गाउँमा अहिले व्यवसायिक कृषि उत्पादनलाई जोड दिन थालिएको छ । रिब्दीकोट गाउँपालिकाको संयोजनमा भइरहेको अकबरे खुर्सानी खेती गरेर किसानले मनग्ने कमाउन थालेका छन् । अकबरे खेतीबाट कमाई हुन थालेपछि व्यापार व्यवसायका लागि शहर पसेका युवाहरु पनि गाउँ फर्कन थालेका छन् । रिब्दीकोट र रैनादेवी छहरामा अकबरे खुर्सानीपछि सुन्तलाको व्यवसायिक उत्पादन हुन थालेको छ । सुन्तलाको बजार राम्रो छ, त्यसैले किसान आकर्षित छन् । तर रोग किराको उपचार बेलैमा नहुँदा किसान मारमा छन् ।
सुन्तलाको व्यवसायिक विकासका लागि यो महोत्सवले टेवा पु¥याउने आशा गर्न सकिन्छ । सुन्तला खेती अझँै विस्तार गर्न संभव छ, युवा पुस्तालाई कृषि उत्पादनमा लगाउन सकिन्छ । वैदेशिक रोजगारीमा गएका युवालाई फर्काएर व्यवसायिक खेतीमा नलगाई उत्पादन बढाउन सकिन्न । विदेशिएका युवा गाउँ फर्केर उत्पादनको काममा नलागी सुखै छैन । त्यसैले प्रतिफलमुखी उत्पादनमा जोड दिने, रोगकिराको उपचारको प्रबन्ध गर्ने र कृषि अनुदान वितरण पारदर्शी ढंगले गर्ने काम तहगत सरकारले गर्नुपर्छ । कृषि उत्पादन बढाउन प्राविधिक र विषयविज्ञबाट सेवा दिने व्यवस्था हुने हो भने किसानलाई सरकार भएको अनुभूति हुन्थ्यो ।
सुन्तला खेती प्रतिफलमुखी खेती हो । यो खेतीबाट राम्रो आम्दानी गर्न सकिन्छ । मध्यपहाडी क्षेत्रमा हुने सुन्तला खेतीलाई विस्तार गर्न सकिन्छ । उत्पादन भएको सुन्तलाबाट जुसलगायत पेय पदार्थ बनाउन सकिने भएकाले व्यवसायिक विस्तारका लागि किसानलाई प्रेरित गर्नुपर्छ । उत्पादन भएका वस्तुको बजारीकरणको व्यवस्था नमिल्दा धेरै किसान विस्तारै अरु पेशा व्यवसायमा लाग्दै आएका छन् । उत्पादनलाई बजारसँग जोड्ने र किसानले उचित मूल्य पाउने व्यवस्थाको सुनिश्चित गर्ने काम सरकारको हो ।
शहर बजारतिर विभिन्न खालका मेला महोत्सव चलिरहेको बेला कृषि उत्पादनको व्यवसायिक प्रवद्र्धनको लागि गरिएको यो महोत्सवले भिन्दै सन्देश दिएको छ ।
महोत्सवमा कति मान्छे आए र कति रुपैयाँको कारोबार भयो भन्ने प्रश्न ठूलो होइन्, महोत्सवले दिने सन्देश ठूलो हो । किसान, उपभोक्ता र सरकारी निकायले महत्वपूर्ण सिकाइ अवसरका रुपमा महोत्सवलाई उपयोग गर्नुपर्छ ।
