बुटवल । नेपालकै दोस्रो ठूलो बुटवल– १५ सेमलारस्थित साना किसान कृषि सहकारी संस्था लि. को २४औं वार्षिक साधारणसभा सम्पन्न भएको छ । कार्यक्रममा सहकारीका अध्यक्ष गोपाल पौड्यालले प्रतिवेदन प्रस्तुत गर्दै संस्थामा २६ सय ६४ जना शेयर सदस्य आवद्ध भएका र ७१ करोड कर्जा प्रवाह भएको बताए । सहकारीमा तीन सय पशुपालक किसान आवद्ध भएका र डेरी समेत सञ्चालन गरी दैनिक तीन हजार लिटर दुध संकलन गरी विक्रि वितरण गरिरहेको बताए । संस्थाले शेयर सदस्यहरुलाई वचतको व्याज फिर्ता गर्न र संरक्षित पूंजिकोषको १८ प्रतिशत लाभांश वितरण गर्न सफल भएको अध्यक्ष पौड्यालले जानकारी गराए । सहकारीले वडा कार्यालयसंग सम्झौता गरी धितो नभएका सदस्यलाई वडाको सिफारिशका आधारमा तरकारी र फलफूल खेती गर्न ६ प्रतिशत व्याजदरमा कर्जा लगानी गरेर ५० बढी सदस्यलाई आय आर्जनमा संलग्न गराएको अध्यक्ष पौड्यालले बताए । यस्तै संस्थाले कृषि र पशुपालन फर्मका लागि व्यक्तिगत ५० लाख रुपैयां र समूहलाई २ करोड रुपैयांसम्म कर्जा साडे ८ प्रतिशत ब्याज दरमा उपलब्ध गराउंदै आएको जानकारी गराए । सहकारीले पशु आहाराका लागि साइलेज उद्योग समेत सञ्चालन गर्दै आएको छ । कार्यक्रममा नेपाल कृषि सहकारी केन्द्रीय संघका अध्यक्ष खेमबहादुर पाठक,सहकारीका पुर्व अध्यक्ष एवं सल्लाहकार रामप्रसाद रेग्मी , बुटवल १५ का वडाध्यक्ष शिव राना,शेयर सदस्य थानेश्वर खरेल,प्रबन्धक शोभाखर शर्मा लगायतले बोल्दै नेतृत्वको कुशल व्यवस्थापन, आर्थिक सुशासन र पारदर्शिताका कारण संस्था देशभरका साना किसान सहकारी संस्था मध्ये दोस्रो ठूलो र उत्कृष्ट सहकारी भएको बताए ।