लुम्बिनी संवाददाता
भैरहवा
एसियाली बिकास बैक (एडीबी), नेपाल सरकार र सिद्धार्थनगर नगरपालिकाको सयुक्त लगानीमा सञ्चालन हुन लागेको युआरएलआइपी योजना अन्तरगतका विभिन्न शहरी सडक निमार्णकालागि  सम्झौता भएको छ । 
एक अर्ब १८ करोडको लागतको उक्त योजनामा बिहीबार सिद्धार्थनगर नगरपालिका र निर्माण कम्पनी ईकेके ईन्फ्रास्ट्रक्चर लि.भारतबिच सम्झौता भएको हो । सम्झौतापश्चात् कार्यादेश पाएको ९ सय दिन भित्र निर्माण कम्पनीले योजना सम्पन्न गरिसक्नु पर्नेछ । यो योजनाअन्तरगत नाली, फुटपाथ, सेफ्टी रेलिङ्ग, खानेपाली, बिजुली, स्ट्रीटलाईट, सडक कालोपत्रे, आरसिसि ढलान तथा नगर सुन्दरीकरणलगायतका काम हुने सिद्धार्थनगर नगरपालिकाका प्रमुख इस्तियाक अहमद खानले जानकारी दिए । उनले यो योजनालाई नगरको गौरवको आयोजनाको रुपमा लिइएको र समयमै सम्पन्न गर्नकोलागि निर्माण कम्पनीलाई आग्रह समेत गरे ।  
एडीबीको ऋण लगानीमा ७५ प्रतिशत नेपाल सरकारको अनुदान, १८ प्रतिशत नगर विकास कोष र नगरपालिकाको ऋण सम्झौता तथा बाँकी ७ नगरपालिकाको आन्तरिक स्रोतबाट लगानी हुने नगरपालिकाका योजना शाखाका इञ्जिनियर साकार श्रेष्ठले जानकारी दिए । 

उनका अनुसार यसअघि एडीबीका आइयुडीपी र आरयुडीपीका योजना सफतापूर्वक सम्पन्न गरे पश्चात नगरपालिकाले तेस्रो चरणको योजना सुरु गरेको हो । अघिल्ला दुई योजनाको उत्कृष्ट व्यवस्थापन गरेबापत नगरपालिका पुरस्कृत समेत भएको थियो । 

बुटवलमा भने एडीबीका फोहोरमैला व्यवस्थापन, खानेपानी र अटो भिलेज गरी तीनवटा ठूला परियाजना स्थानीयस्तरको विवाद समाधान गर्न नसकेका कारण गुमेका थिए । 

सिद्धार्थनगर नगरपालिकाकी उप–प्रमुख उमा अधिकारीले नगरपालिकाको अथक प्रयासले गर्दा अन्य पालिकामा भन्दा सिद्धार्थनगरमा ठेक्का प्रक्रिया छिटो र पारदर्शी भएर लागू हुने चरणमा पुगेको उल्लेख गर्दै निर्माणको क्रममा पनि नगरपालिकाले पूर्णरुपमा सहजीकरण गर्ने बताइन् । एडीबीको ऋण लगानीमा हुने युआरएलआइपी योजना रुपन्देहीका सिद्धार्थनगरसहित तिलोत्तमा, देवदह, सैनामैना र लुम्बिनी सांस्कृतिक नगरपालिकामा पनि आएको छ । तर ती पालिकाहरुमा योजना अध्ययनकै क्रममा छन् । सिद्धार्थनगरमा ठेक्का सम्झौतासम्मको चरणमा आएको हो । 

यो योजनाअन्तरगत  विभिन्न २७ बटा सडकतर्फ साढे २३ किलोमिटर बढी लम्वाईका सडक निर्माण हुने छ । सुगरमिल, सुकुनीपथदेखि डण्डा कोरिडोर जाने सडक, भिमकाली पथ, दुर्गा कोलीनीका भित्री सडकहरु निर्माण हुने सिद्धार्थनगर नगरपालिकाका प्रमुख प्रशासकीय अधीकृत जनक थापाले बताए ।

 सम्झौतापश्चात् एक दुई महिनाभित्रमा नै  योजना कार्यान्वयनको चरणमा जाने र योजना पुरा हुँदा नगरको बिकासले फड्को मार्ने बताए । धेरै मेहनत गरेर नगरको रणनीतिक योजनालाई समयमै सुरु गर्न सफल भएको समेत उनले बताए । निर्माण कम्पनी ईकेके इन्फ्रास्ट्रक्चर लि.का प्रतिनिधि विक्रम गौतमले नगरको गौरवको योजनालाई आफूहरुले समयमै पूरा गर्ने प्रतिबद्धता जनाए ।