बुटवल उप–महानगरपालिकाले व्यवसायीले राखेको साइनबोर्डको समेत कर लिनु निन्दनीय छ । एउटा व्यवसायीले कति ठाउँ कर तिर्छ ? त्यो हेक्का नगरी साइनबोर्डको समेत कर लिनु गलत छ ।
व्यवसायीले व्यवसायिक फर्म दर्ता र नविकरण कर तिर्छन् । व्यवसायीले कारोबार र नाफामा पनि कर तिर्छन् । घरबहाल कर समेत व्यवसायी नै तिर्न बाध्य छन् । विभिन्न सरकारी निकायमा तिर्ने करको चाङले थिलोथिलो भएका व्यवसायीलाई साइनबोर्ड राख्दा उपमहानगरपालिकाले असहज व्यवहार गर्नु गलत हो । बुटवल उप–महानगरपालिकाले ३० वर्गफुटभन्दा बढीको साइनबोर्ड भए कर लिने कानुनी प्रबन्ध गरेको छ । व्यवसायीले एउटा साइनबोर्ड राख्न समेत उप–महानगरपालिका असहज बनेको गुनासो गरेका छन् ।
साइनबोर्ड मनपरी राखेको छ, एउटाभन्दा बढी राखेको छ भने कर लिनु स्वाभाविक होला, एउटा साइनबोर्डको साइज निर्धारण गरेर कर लिनु स्वाभाविक होइन् । शहर गुल्जार हुनका लागि व्यवसायी, मजदुर टिक्ने वातावरण हुनुपर्छ । ठूला व्यवसायी, साना व्यवसायी, सटरमा व्यापार गर्नेदेखि ठेला र फुटपाथमा व्यापार गर्ने सबै टिक्न सक्दा नै शहर गुल्जार हुन्छ । व्यवसायीलाई अनावश्यक कर थोपर्ने र फुटपाथमा व्यापार गर्नेलाई दुव्र्यवहार गर्ने क्रियाकलापले शहर निर्जन हुन्छ ।
व्यवसायी मैत्री वातावरण जहाँ हुन्छ, व्यवसायी त्यही जान्छन् । बुटवलमा चर्को सटरभाडाले धमाधम व्यवसायी बुटवलको मुख्य बजार क्षेत्रबाट बाहिर निस्कदैछन् । तिलोत्तमा र सैनामैनातिर व्यवसायी आकर्षित भइरहेका छन् । मासु व्यवसायीमाथि भएको दुव्र्यवहार र ज्यादतीले अहिले मासु व्यवसायीले विकल्प खोज्न थालेका छन् ।
स्थानीय सरकार नागरिकको घरदैलोको सरकार हो । स्थानीय सरकार सेवा प्रवाहको केन्द्र हो । स्थानीय सरकारले नागरिकलाई सहमत गराएर कर लिनुपर्छ । नागरिकको सहमति विना कर थोपर्ने प्रवृत्तिले नागरिक प्रतिरोध हुन्छ । त्यस्तो प्रतिरोध बढ्दै गए सरकारले काम गर्न सक्तैन् । बजेट कार्यान्वयन गर्न सक्तैन् । योजना निर्माण र कार्यान्वयनमा बाधा उत्पन्न हुन्छ । योजना निर्माण र कार्यान्वयन तथा बजेट कार्यान्वयनमा बाधा उत्पन्न हुने गरी कुनै पनि गतिविधि गर्दा सरकारले विकासको लक्ष्य हासिल गर्न सक्तैन् ।
बुटवल उप–महानगरपालिकाले कम्तिमा साइनबोर्डको कर असुली तत्काल रोकेर व्यवसायीसँग छलफल गर्नुपर्छ । व्यवसायीसँगको छलफलपछि निस्कने निष्कर्षलाई कार्यान्वयन गर्दा सहज वातावरण बन्छ । व्यवसायी मैत्री वातावरणले नै बुटवल उप–महानगरपालिकाले आशा जगाउनसक्छ ।
