बालबालिकालाई स्थानीय इतिहास, संस्कृति, भूगोल, सम्पदालगायतका विषयमा जानकारी दिन सरकारले विद्यालय तहमा स्थानीय पाठ्यक्रम तयार गरी पठनपाठनको व्यवस्था मिलाएको छ । मुलुकमा संघीय शासन प्रणाली स्थापना भएपछि स्थानीय सरकारलाई स्थानीय पाठ्यक्रम निर्माण गरी लागु गर्न जिम्मेवारी भए पनि कार्यान्वयन हुन नसक्दा लक्षित उद्देश्य हासिल हुन सकेको छैन् ।
कतिपय पालिकाले पाठ्यक्रम तयार गरेकै छैनन् । कतिपयले तयार गरेका छन्, लागु गर्न सकेका छैनन् । पाठ्यक्रम तयार नगरेका कतिपय पालिका स्थानीय पाठ्यक्रमको महत्वका बारेमा गम्भीर भएको पाइदैन् । स्थानीय पाठ्यक्रम लागु गर्नुको उद्देश्यलाई हेक्का नराखी अघि बढ्नु स्थानीय तहको खेलाँची हो । पाठ्यक्रम राख्न ठिक कि बेठिक भन्ने निष्कर्ष प्रयोग भएपछि निकाल्न सकिन्छ । पाठ्यक्रम लागु नै नगर्नु कमजोरी हो । पाठ्यक्रम तयार नगरेका स्थानीय तहको सूची तयार गरी तत्काल पाठ्यक्रम तयार गर्न र लागु गराउन संघीय सरकारको शिक्षा मन्त्रालयअन्तर्गतको विषयगत कार्यालय सक्रिय हुनुपर्छ । जे–जति स्थानीय तहले पाठ्यक्रम तयार गरी लागु गरेका छन्, ती स्थानीय तहको पाठ्यक्रममा समयानुकुल सुधार गरी गुणस्तरीय पाठ्यक्रम तयार गर्न ध्यान दिनुपर्छ ।
पाठ्यक्रम तयार भयो तर गुणस्तरीय भएन भन्ने प्रश्न उठेको छ । पाठ्यक्रम तयार गर्दा विज्ञ समूह बनाउँदा विषयगत प्रतिनिधित्व गर्ने विज्ञहरु सहभागी गराउँदा पाठ्यक्रम ओजिलो तयार हुन्छ । इतिहास, संस्कृति, भूगोल, जनजीवन, कला संस्कृतिका विषयका बारेमा सम्बन्धित विज्ञले तयार गर्ने र ती सामग्रीलाई भाषा र पाठ्यक्रम विज्ञले सम्पादन गरी अन्तिम रुप दिंदा मात्रै ओजिलो बन्ने हो । पाठ्यक्रम विज्ञ समूहमा एउटै प्रकृति र विषयसँग सम्बन्धित व्यक्ति राखेर राम्रो पाठ्यक्रम तयार हुन सक्तैन् ।
स्थानीय तहले स्थानीय पाठ्यक्रममा समावेश भएका विषयबस्तु र पाठ्य सामग्रीको अंकभार बीच तारतम्य नमिलेको टिप्पणी भएका बेला जिल्लाभित्रका स्थानीय तह मिलेर स्थानीय पाठ्य सामग्री बनाउन सक्दा अंकभार र पाठ्यसामग्रीबीचको तारतम्य मिल्न सक्छ । पाठ्यसामग्री तयार गर्दा विषयवस्तु समावेश एउटा पाटो हो, विषयवस्तुको प्रस्तुति पनि महत्वपूर्ण हुन्छ । अहिले नमिलेको विषयवस्तु र प्रस्तुतिमा हो ।
संघीय शासन प्रणाली स्थापना भएपछि स्थानीय तहमा राजनैतिक नेतृत्व स्थापित भएको सात वर्ष बितिसकेको छ । राजनैतिक नेतृत्वले पहिलो पाँच वर्षे कार्यकाल पूरा गरी दोस्रो कार्यकालको मध्यतिर आइपुगेकोले पाठ्यक्रमको विषयवस्तु र प्रस्तुतिलगायत समग्र पक्षको मूल्याङ्कन गर्ने र परिमार्जन गर्ने सही समय आएको छ ।
