बुटवल । रुपन्देही र पाल्पालाई जोड्ने गरी निर्माण भइरहेको सिद्धार्थ राजमार्गमा पर्ने सिद्धबाबा सुरुङमार्गका बाइपास सुरुङहरू ब्रेक थ्रु भएका छन् ।
तीनवटा बाइपास सुरुङमध्ये तेस्रो सुरुङ ब्रेक थ्रु भएसँगै तीनवटै बाइपास सुरुङ तयार भएको सिद्धबाबा सुरुङ मार्ग आयोजनाकी सूचना अधिकारी इन्जिनियर सविता ज्ञवालीले बताइन् । पहिलो बाइपास सुरुङ २६ भदौमा भएको थियो भने दोस्रो बाइपास ४ असोज र तेस्रो बाइपास ७ पुसमा ब्रेक थ्रु भएसँगै बाइपास सुरुङ तयार भएका हुन् ।
मुख्य टनेल अब ६६ मिटर मात्रै खन्न बाँकी रहेको सिद्धबाबा सुरुङ मार्ग आयोजनाकी सूचना अधिकारी इन्जिनियर सविता ज्ञवालीले बताइन् । उनले अहिलेसम्म १ हजार २३ मिटर सुरुङ खनिएको जानकारी दिइन् । उनले यही रफ्तारमा काम भएमा २० पुससम्म मुख्य टनेल ब्रेक थ्रु हुने उनले जानकारी दिइन् ।
पहिलो बाइपास माथिल्लो सिद्धबाबा मन्दिरतर्फको र तेस्रो बाइपास दोभान ड्याम साइडतर्फको हो । मुख्य टनेलको भागसम्म नपुगेको र केही लामो भएकाले दोस्रो बाइपास ब्रेक थ्रु हुन समय लागेको थियो । मुख्य सुरुङको दुवैतर्फबाट दैनिक विस्फोटसहित खन्ने काम जारी रहेको ज्ञवालीले बताइन् ।
दुर्घटनाको उच्च जोखिमयुक्त पाल्पाको तिनाउ गाउँपालिका– ३ दोभानमा सुरुङ मार्ग बनिरहरेको छ । यो सुरुङमार्गलाई सरकारले राष्ट्रिय गौरवको आयोजनाका रूपमा लिएर काम सुरु गरेको हो ।
सिद्धार्थ राजमार्गको चिडियाखोला–दोभान सडक खण्डमा बारम्बार पहिरो खसेर दुर्घटना हुने गरेपछि विकल्पका रूपमा सुरुङ निर्माणको योजना अघि बढेको थियो । यस खण्डको ४ किलोमिटर क्षेत्रमा अत्यधिक पहिरो खस्ने क्षेत्रभित्र पर्छ ।
चाइना स्टेट कन्स्ट्रक्सन इन्जिनियरिङ कर्पोरेसनले ७ अर्ब ३४ करोड २१ लाखमा सुरुङमार्गको ठेक्का लिएको छ । अहिले दैनिक डेढ सयदेखि २ सय जना कामदारले काम गरिरहेको आयोजनाले जनाएको छ । सुरुङ खनेर सुरक्षाका लागि गरिने कामका साथै बाटो फराकिलो पार्नेसहित अन्य काम सुरु भइसकेको आयोजनाले जनाएको छ । आयोजनाले भित्र काम भइरहेकाले बाहिरको काम गरेको छैन । सुरुङबाहिरको पहाडमा पहिरो बग्न नदिने गरी काम भइरहेको छ ।
सुरुङमार्गभन्दा दक्षिणतर्फको सडकलाई सुरक्षित बनाउन रक सेड र सडकको डिजाइनको कामसमेत अब अघि बढाइने योजना प्रमुख कृष्णराज अधिकारीले बताए । त्यसका लागि पनि डिजाइन फाइनल भइसकेको उनले बताए ।
सिद्धबाबा क्षेत्रको बाहिरी पहाडमा पहिरो जान रोक्न ‘रक सेड’ प्रविधिबाट दक्षिणमा १ हजार ४९५ वर्गमिटरको काम भएको छ । उत्तरतर्फ ४९५ वर्गमिटर ‘प्रोटेक्सन’ को काम अघि बढेको छ । यो सुरुङमार्ग बाहिरपट्टिको खण्डमा रक सेड, रक फल ब्यारियर र स्लोप प्रोटेक्सनको काम हुनेछ ।
योजनाअन्तर्गत बुटवलतर्फको चिडियाखोलाबाट ९ सय १० मिटर र पाल्पातर्फ ५ सय ६० मिटर दुई लेनमा सडक सुधारको काम पनि थालिने आयोजनाले जनाएको छ । मुख्य सुरुङको ब्रेक थ्रु पछि ढलान र सडक बनाउन सुरु गरिनेछ । सिद्धबाबा सुरुङमार्ग आयोजना २०७८ सालमै सुरु भएको हो । सुरुङमार्ग १३ चैत २०८३ मा सक्नुपर्ने सम्झौतामा उल्लेख छ । ईपीसी मोडलको ठेक्का भएकाले यसअन्तर्गतका सम्पूर्ण संरचनाको डिजाइन, निर्माण तथा मर्मतको जिम्मा निर्माण व्यवसायीको रहनेछ ।
आयोजनाअन्तर्गत २ हजार ३ सय ९८ मिटर सडक स्तरोन्नति हुनेछ । ७ सय ८० मिटरमा रकसेड, १ सय ५५ मिटर, १ सय ४५ मिटर र १ सय ३१ मिटर गरी ४ सय ३१ मिटरका तीनवटा बाइपास सुरुङसमेत निर्माण हुनेछन् । आयोजनाअन्तर्गत नै उत्तरी र दक्षिणी प्रवेशद्वारमा दुई प्राविधिक भवनसमेत निर्माण हुने आयोजनाले जनाएको छ ।
