बुटवल । बुटवल–८ सुख्खानगरस्थित क्यानन् माविको आयोजनामा बिहीबारदेखि सेभेन ए साइड इन्टर कलेज फुटबल प्रतियोगिता शुरु भएको छ ।
प्रतियोगिताको बुटवल नगर खेलकुद विकास समिति अधयक्ष बोनिन पियाले उद्घाटन गरे । सो अवसरमा बोल्दै पियाले शैक्षिक गुणस्तर  सँगै खेलकुदमा पनि क्यानन अगाडि रहेको चर्चा गर्दै खेलकुदका विभिन्न विधामध्ये एक विद्यालयले एक विधालाई प्राथमिकता दिएर लगानी गरे राम्रो नतिजा आउने बताए ।

विद्यार्थीले पनि आफ्नो रुचिको कुनै एक खेल रोजेर त्यसमै मेहनत गरे सफल भइने सुझाव दिए ।  हरेक विद्यालयमा खेल शिक्षक आवश्यक रहेको भन्दै उनले खेलकुदले विद्यार्थीलाई  अनुशासित र मर्यादित बनाउने बताए । विद्यालय व्यवस्थापन समिति अध्यक्ष थानेश्वर पौडेल, प्रबन्ध निर्देशक दीपक पौडेल, वरिष्ठ शिक्षक वेदनिधि घिमिरे, अतिरिक्त  क्रियाकलाप प्रमुख मिनराज गिरी, पवन बस्याल लगायतले बोल्दै  स्वस्थ जीवन र मानसिक स्वास्थ्यका लागि खेलकुद प्रतियोगिताहरुको  महत्वपूर्ण भूमिका हुने बताए । खेलमा सफलता हासिल गर्न स्कुल÷कलेज जीवनबाट नियमित अभ्यास र प्रतियोगितामा भाग लिनुपर्नेमा उनीहरुले जोड दिए ।
प्राचार्य शंकर भण्डारीले विद्यार्थीको खेल प्रतिभा प्रस्फुटन गराउन, अन्तर विद्यालय र  विद्यार्थीबीच आत्मीय सम्बन्ध विस्तार, सामूहिक भावनाको विकास र राष्ट्रिय खेलाडी उत्पादनको लक्ष्य सहित प्रतियोगिता आयोजना गरिएको बताए ।   प्रतियोगितामा रुपन्देहीका २६ कलेजका २६० खेलाडी सहभागी छन् । 
१४ गतेसम्म चल्ने प्रतियोगिताको विजेता टिमले ५० हजार , द्धितीय हुने टिमले ३० हजार , बेस्ट प्लेयरले २ हजार ५००, हाइ स्कोररले २ हजार ५००, बेस्ट गोल किपरले २ हजार ५०० मेडल र प्रत्येक खेलमा उत्कृष्ट खेलाडीले मेडल र ५५५ प्राप्त गर्ने विद्यालयका प्लस टु संयोजक पवन बस्यालले जानकारी दिए । बिग एजुकेश कन्सलटेन्सी मुख्य प्रायोजक रहेको प्रतियोगिता सम्पन्न गर्न ७ लाख खर्च लाग्ने अनुमान आयोजकको छ ।
प्रतियोगिता बिहान र बेलुका गरी दिनमा ६ खेल खेलाइने छ ।