देवदह नगरपालिका वडा नम्बर ६ सरनबारीका किसानले ८ करोड रुपैयाँको तरकारी बेचेर आम्दानी गरेका छन् । उनीहरुले गरेको यो आम्दानी सिमी बिक्रीबाट भएको हो । सरनबारीका १ सय ६० घरधुरीका किसानले ५ कठ्ठादेखि एक बिघा जग्गामा सीमि खेती गर्दै आएका छन् ।
एउटै गाउँमा सिमि बिक्रीबाट ८ करोड रुपैयाँ भित्रिनु कृषिकर्मबाट राम्रो आम्दानी गर्न सकिन्छ भन्ने एउटा उदाहरण हो । अहिले नेपालमा कृषिकर्मबाट केही गर्न सकिंदैन्, उत्पादन लागत बढी छ, बजार बिचौलियाको हातमा छ जस्ता अनेक निराशाका कुरा उठाउने गरिन्छ । तरउत्पादन हुने कृषिबालीको पहिचान, बजारको अवस्थालगायत ख्याल गरेर खेती गर्ने हो भने राम्रो आम्दानी गर्न सकिन्छ भन्ने सरनबारीका किसानले पुष्टि गरेका छन् । सरनबारी गाउँ चुरेको फेदमा रहेको छ । यहाँका किसानले सीमि खेती गर्दा रासायनिक मल र विषादी प्रयोग गर्दैनन् । प्रांगारिक खेती गर्दै आएका उनीहरुलाई देवदह नगरपालिकाले प्रांगारिक मलमा अनुदान दिँदै आएको छ ।
किसानले आफ्नै ढंगले तरकारी खेती गर्दै आएकामा सरोकारवाला सरकारी निकाय खोज्दै उनीकहाँ पुगेका छन् ।
मगर समुदायको बसोबास रहेको यो गाउँमा कृषि पर्यटन प्रवद्र्धन गर्न सकिन्छ । स्थानीय उत्पादनका विभिन्न परिकार खुवाएर होमस्टे चलाउन सकिन्छ । प्रांगारिक तरकारी खेती उत्पादनको तरिका अरुलाई सिकाउन सकिन्छ । यसका लागि समुदायको जाँगर आवश्यक छ । समुदायको मेलमिलाप बढाउन उत्तिकै ध्यान दिनुपर्छ । समुदाय मिलेर होमस्टे चलाउने, मगर संस्कृति प्रवद्र्धन गर्ने र प्रांगारिक खेती अध्ययन गर्ने थलोको पहिचान दिने हो भने सरनबारी नेपालकै नमूना गाउँ बन्न सक्छ । देवदह नगरपालिकाले सरनबारीलाई नेपालकै नमूना गाउँको रूपमा विकास गर्न योजनाबद्ध रुपमा काम गर्दा देवदहको पहिचान स्थापित गर्न बल पुग्छ ।
